• Məhərrəm gəldi
    Məhərrəm gəldi

Allahın ayı sayılan Məhərrəm ayı böyük fəzilətlərə malik olan bir aydır və bu ayın özünəməxsus əməlləri var.

Məhərrəm ayının ilk gecəsi: İbni Tavus "İqbal” kitabında bu gecə haqqında bir neçə namaz zikr etmişdir: 1. Yüz rükət namazdır ki, hər bir rükətində "Həmd” və "Tövhid” surələri oxunur. 2. İki rükətli namazdır ki, birinci rükətdə "Həmd” və "Ənam” və ikinci rükətdə isə "Həmd” və "Yasin” surəsi oxunur. 3. İkirükətli namazdır ki, hər bir rükətində "Həmddən” sonra 11 dəfə "Tövhid” surəsi oxunur. Peyğəmbərdən (s) nəql edilir: "Hər kim bu iki rükət namazı bu gecədə yerinə yetirərsə, sabahısı günü oruc tutsun. Əgər belə edərsə bütün il boyu xeyir iş görmüş şəxs kimi olar. Həmin il boyunca (Allah tərəfindən) qorunar. Əgər ölərsə, behiştə gedər”.Birinci gün: Oruc tutmaq. Riyan ibni Şəbib İmam Rzadan nəql edir: "Hər kim bu günü oruc tutarsa və Allahı çağırarsa, Allah onun duasını yerinə yetirər. Necə ki, Zəkəriyyanın (ə) duasını qəbul etmişdi". İmam Rzadan (ə) nəql edilir: "Peyğəmbər (s) Məhərrəm ayının birində iki rükətli namaz qılardı. Qurtarandan sonra əllərini göyə qaldıraraq bu duanı edərdi: Allahım, Sən əzəli Məbudsan! Bu Sənin ilindir. Bu aydan Səndən şeytanın şərrindən uzaq olmağımı, günah işlədə bilən nəfsə qələbə çalmağımı, məni Sənə yaxınlaşdıracaq işlərlə məşğul olmağımı istəyirəm. Ey Böyük və böyüklərin Sahibi! Ey sığınacağı olmayanların Sığınacağı! Ey o kəsin qəm yoldaşı ki, onun qəm sirdaşı yoxdur! Ey o kəsin pənah yeri ki, başqa pənah yeri yoxdur! Ey o kəsin fəryadına çatanı ki, fəryadına çatan yoxdur! Ey o kəsin himayəçisi ki, onun himayəçisi yoxdur! Ey o kəsin xəzinəsi ki, onun xəzinəsi yoxdur! Ey yaxşı imtahan edən, ey ümidlərin böyüyü, ey gücsüzlərin izzəti, ey qərq olmuşların nicat verəni, ey həlak olanları xilas edən, ey nemətlər bəxş edən...”. Üçüncü gün: Həzrət Yusifin (ə) zindandan azad olduğu gündür. Kim həmin günü oruc tutarsa, Allah Təala çətin işləri onun üçün asan edər. Qəmi ondan uzaqlaşdırar. Duası qəbul olar.Doqquzuncu gün: Tasua günüdür. İmam Sadiqdən (ə) nəql edilir: "Tasua o gündür ki, İmam Hüseyni (ə) və tərəfdaşlarını Kərbəlada mühasirəyə aldılar. Şam ordusu Həzrətlə döyüşmək üçün dairə qurdu. İbni Mərcanə və Ömər Səd ordunun çoxluğuna görə sevinirdilər. İmam Hüseyni (ə) və səhabələrini zəif hesab edirdilər. Həzrətin köməyinə heç kimin gəlməyəcəyinə arxayın oldular və İraq xalqının ona yardım etməyəcəyinə əminlik əldə etdilər”.Onuncu günün gecəsi: Aşura gününün gecəsidir. Seyid Tavus bu gecə üçün çox sayda namaz və dualar zikr etmişdir. O cümlədən yüz rükət namaz vardır ki, hər rükətində "Həmd” surəsindən sonra üç dəfə "tövhid” deyilir və sonra bu duanı oxuyursan: "Allah münəzzəhdir, Allaha həmd olsun, Allahdan başqa məbud yoxdur. Allah böyükdür”. Başqa bir hədisdə tövbə etmək də zikr edilmişdir. Gecənin sonunda dörd rükət namaz zikr edilmişdir ki, hər bir rükətində "Həmddən” sonra "Ayətil-kürsünün” hər hansı bir ayəsi, "Tövhid”, "Nas”, "Fələq” surələrini on dəfə oxumaq. Salamdan sonra yüz dəfə "Tövhid” surəsini oxumaq. Başqa bir namaz dörd rükətli namaz vardır ki, hər rükətində "Həmddən” sonra 50 dəfə "Tövhid” surəsini oxumaq lazımdır. Bu namaz Əmirəl-möminin (ə) namazına bərabərdir və çox fəzilətlidir. Namazdan sonra Allahı çoxlu zikr edin və Peyğəmbərə (s) salavat göndərin. Nə qədər bacarırsınızsa əhli-beytin düşmənlərinə lənət deyin. Bu gecədə ibadət etmək bütün mələklərin ibadəti kimidir. Bu gecənin ibadəti 70 ilin ibadətinə bərabərdir. Əgər bir kəs bu gecə Kərbəlada olarsa, İmam Hüseyni (ə) ziyarət etsin və o Həzrətin hərəminin yanında səhərə qədər dua etsin. Allah onu, şəhidlər sırasında məhşur edər.Aşura günü: Həzrət Hüseynin (ə) şəhid olan günüdür. Bu gün Məsumların (ə) və onların davamçılarının qəm və qüssə günüdür. Bu gün yaxşı olar ki, müsəlmanlar dünya işləri ilə məşğul olmasınlar. Göz yaşı töksünlər və mərsiyə desinlər. İmam Huseynə(ə) əzadarlıq keçirtsinlər. Sanki övladları və yaxın əzizlərinin əzadarlığını keçirirmiş kimi bu işə şövqlə yanaşsınlar. "Aşura" ziyarətini oxumaqla Həzrəti (ə) ziyarət etsinlər. Həzrətin qatillərinə lənət oxusunlar. Həmin günü oruc tutmayın, ancaq yemək və içməyə meyl göstərməyin. Əsrdən sonra müsibət əhlinin iftar etdiyi yeməklərdən yeyin... qatıq və süd kimi. Əllamə Məclisi buyurmuşdur: "Yaxşı olar ki, Məhərrəm ayının doqquzuncu və onuncu günü oruc tutmayasınız. Çünki Bəni-Ümməyə bərəkət olsun deyə bu iki günü oruc tuturdular. Bu iki gündə oruc tutmağın fəzilətli olmasını Peyğəmbərə (s) nisbət verməklə yalan deyirdilər. Əhli-Beytdən (ə) bu iki gündə oruc tutmaq haqqında çox sayda hədis nəql edilmişdir. Bu iki gündə, xüsusilə də Aşura günündə oruc tutmaq məzəmmət olunmuşdur". Həzrət Rzadan (ə) nəql edilir: "Hər kim Aşura günü öz ehtiyaclarını unudaraq iş dalınca getməzsə, Allah onun dünya və axirət ehtiyaclarını ödəyər. Hər kim Aşura günü qəmgin və ağlar olarsa, Allah Qiyamət gününü onun sevincli və xoşhal olan günü edər. Behiştdə nəzərləri bizimlə aydın olar. Hər kim Aşura günü bərəkət günü adlandırar, həmin günü evi üçün nəsə alarsa, Allah aldığı şeyi onun üçün mübarək etməz. Qiyamət günü Yezid, Ubeydullah ibni Ziyad və Ömər ibni Sədlə məhşur olar". Ona görə də bu günü insan dünya işləri ilə məşğul olmamalıdır. Ağlamalı və mərsiyə deməlidir. Ev əhlinə göstəriş verin ki, o Həzrətin əzasını saxlasınlar. Matəm və əzadarlıqla məşğul olsunlar.

Sep 22, 2017 08:56 Asia/Baku
Şərhlər