SAHAR

İran İslam Respublikasının xarici işlər naziri Məhəmməd Cavad Zərif çərşənbə axşamı İstanbulda Azərbaycan və Türkiyənin xarici işlər nazirləri Elmar Məmmədyarov və Mövlud Çavuşoğlu ilə görüşüb, danışıqlar aparıb.

İRİB-nin verdiyi məlumata görə, Məhəmməd Cavad Zərif və Elmar Məmmədyarov arasında baş tutan görüşdə ikitərəfli əlaqələr, regional məsələlər və İslam Dünyasının məsələləri haqda fikir mübadiləsi aparılıb.

Məhəmməd Cavad Zərif həmçinin, Azərbaycan və Türkiyə xarici işlər nazirləri ilə üçtərəfli iclasdan öncə türkiyəli həmkarı Mövlud Çavuşoğlu ilə də görüşüb. Görüşdə iki tərəfi maraqlandıran məsələlər müzakirə edilib.

Zərif bazar ertəsi günü İran, Azərbaycan və Türkiyə xarici işlər nazirlərinin 6-cı üçtərəfli iclasında iştirak etmək məqsədilə İstanbula səfər edib.

İran, Azərbaycan və Türkiyə xarici işlər nazirlərinin üçtərəfli iclasında üçtərəfli əlaqələr habelə, siyasi və iqtisadi əməkdaşlıqlar haqda fikir mübadiləsi aparılacaq.

Regionun hazırkı durumu və İslam Dünyasının önəmli məsələləri də müzakirə mövzularındandır.