SAHAR

İran İslam Respublikasının Tacikistandakı səfirliyi bir bəyanat yayaraq, Tacikistan dövlət televiziyasından İran əleyhinə səsləndirilən iddiaları əsassız adlandırıb və təfriqə xarakterli addımların iki ölkə xalqının maraqlarına uyğun olmadığını bildirib.

Tacikistanın Daxili İşlər Nazirliyi son zamanlar bir sənədli film yayaraq, İranın ötən əsrin 90-cı illərində bu ölkənin daxili işlərinə müdaxilə etdiyini iddia edib. 

İRİB-nin verdiyi məlumata görə, İran İslam Respublikasının Tacikistandakı səfirliyi çərşənbə günü yaydığı bəyanatda Tacikistan televiziyasında yayımlanan sənədli filimdə səsləndirilən iddiaları təkzib edib. 

İran səfirliyi bu kimi əsassız iddiaların səsləndirilməsindən təəssüfləndiyini bildirərək, əlavə edib: Bu filmi hazırlayanlar İran və Tacikistan xalqları arasındakı mədəni və dostluq əlaqələrində pozuculuq törədə bilməyəcəklər. 

İran İslam Respublikası səfirliyi həmçinin bildirib: Tacikistan xalqı İran İslam Respublikasının Tacikistanda sülh və sabitliyin əsas təminatçılarından biri olaraq ötən əsrin 90-cı illərində Tacikistanda gedən vətəndaş müharibəsinin sonlandırılması üzrə münaqişə tərəfləri arasında vasitəçilik və müzakirələrə ev sahibliyi etməklə necə bir konstruktiv rol oynadığını unutmayacaq. 

İran səfirliyi öz bəyanatında əlavə edib: İran Tacikistanda infrastrukturların yaradılması, səhiyyə xidmətlərinin göstərilməsi, idman komplekslərinin yaradılması, Tacikistan gənclərinə universitetlərdə təhsil almaq imkanı yaratması, Tacikistanın elmi mərkəzləri və universitetlərinə yardımların göstərilməsi Tacikistanda onlarla elmi və texniki peşə mərkəzlərinin yaradılması ilə sözün əsl mənasında bu ölkənin inkişafına, öz müstəqilliyini qorumasına və davamlı təhlükəsizliyə malik olmasına misilsiz dəstək nümayiş etdirib və Tacikistan hökumətinin dayaqlarının möhkəmlənməsinə kömək edib. 

Bəyanatda həmçinin deyilir: Bu filmin Tacikistanın energetika və su ehtiyatları nazirinin İrana səfər etməsinin ardınca yayımlanması bəzi tərəflərin İran və Tacikistan arasındakı dostluq əlaqələrindən narahat olduqlarını və bu əlaqələrin inkişaf etməsini istəmədiklərini göstərir.