İran və Belarus müdafiə sahəsində əməkdaşlıq haqqında memorandum imzalayıb
İran və Belarus müdafiə nazirləri bazar ertəsi Tehranda keçirilən görüşdə müdafiə sahəsində əməkdaşlıq haqqında anlaşma memorandumu imzalayıblar.
SəhərAzəri-nin məlumatına əsasən, İran Müdafiə Nazirliyinin qərargahında keçirilən görüşdə qarşılıqlı maraq doğuran məsələlər ətrafında fikir mübadiləsi aparılıb və iki tərəf arasında müdafiə sahəsində əməkdaşlıq sazişinin imzalanması ilə yekunlaşıb.
İranın müdafiə naziri briqada generalı Məhəmməd Rza Aştiani iki ölkənin bir çox regional və beynəlxalq məsələlərdə ortaq baxışlarına toxunaraq, deyib: “Belarus İranın xarici siyasətində xüsusi yer tutur”.
O, müdafiə sahəsində əməkdaşlığın vacibliyini vurğulayaraq, bildirib ki, İran və Belarusun imkanlarından istifadə və müdafiə sinerjisi regionda sülh, sabitlik və təhlükəsizliyi gücləndirəcək.
Suriya və İraqdakı regional müharibələrə, eləcə də Ukrayna böhranına işarə edən iranlı nazir qeyd edib ki, bu cür dəyişikliklər dünyanın yeni həndəsə və beynəlxalq nizama keçidindən xəbər verir. Hansı ki, bu nizamda müstəqil ölkələr birqütblü və iyerarxik qlobal sistemi qəbul etmək istəmirlər, əksinə qlobal idarəçilikdə daha böyük rol oynamağa və daha çox iştirak etməyə çalışırlar".
Briqada generalı Aştiani həmçinin, digər region ölkələrinin narahatlığını nəzərə almadan, NATO-nun şərqə doğru genişlənməsinin Ukrayna böhranının əsas səbəbi olduğunu bildirərək, deyib: “İran Ukraynadakı münaqişələrin sülh yolu ilə həllinə aparan istənilən diplomatik səyləri dəstəkləyir”.
Belarus Respublikasının müdafiə naziri də öz növbəsində İslam Respublikasının əldə etdiyi diqqətəlayiq tərəqqiyə toxunaraq, deyib: “Bu görüş iki ölkənin ortaq məqsədləri naminə münasibətlərin dərinləşdirilməsi imkanlarını artıracaq”.
“İnanırıq ki, müdafiə və hərbi əməkdaşlıqdan əlavə, iki ölkənin müdafiə nazirlikləri öz potensiallarından istifadə edərək, digər maraq sahələrini artırmaq üçün birbaşa və dolayısı ilə əməkdaşlıq edə bilərlər”, - deyə Viktor Xrenin əlavə edib.
