Yaponiyanın Azərbaycandakı səfirliyinin iqtisadiyyat attaşesi Astara-Astara dəmir yolunun təkmilləşməsi ilə region ölkələri arasında qeyri-neft məhsullarının ixracat həcminin artacağını deyib.

Fars xəbər agentliyinin verdiyi məlumata görə, Tuşi Hiro Katagiri çərşənbə axşamı Astara-Astara dəmir yoluna baxış keçirdiyi zaman jurnalistlər qarşısında deyib: Bu dəmir yolunun təkmilləşdirilməsi ilə İrandan Azərbaycana və Rusiyaya daha çox məhsulun daşınmasına şərait yaranacaq.

Tuşi Hiro Katagiri həmçinin deyib: Yaponiya şirkətləri və yapon iş adamları beynəlxalq əhəmiyyətli Astara-Astara dəmir yolunun önəmini nəzərə alaraq, bu nəqliyyat marşrutundan istifadəyə böyük maraq göstərir və region ölkələri ilə öz ticarət əlaqələrini genişləndirməyə çalışırlar.

Astara-Astara dəmir  yolunun istifadəyə verilməsi habelə, Rəşt-Astara dəmir yolunun təkmilləşdirilməsi ilə İran Azərbaycan Respublikası yolu ilə Avropaya çıxış əldə etmiş olacaq. Eyni zamanda, Azərbaycan da İranın dəmir yolları ilə Fars körfəzinə birbaşa çıxış imkanına yiyələnəcək.