İnzibati Xətalar Məcəlləsinə ianələr ilə bağlı dəyişiklik təklif edilib.Mərkəzi Seçki Komissiyasına (MSK) barəsində məlumat təqdim edilməyən ianə üzrə bank əməliyyatı aparan siyasi partiyalar cərimələnəcək.

İnzibati Xətalar Məcəlləsinə təklif edilən dəyişikliklə "Siyasi partiyalar haqqında" qanunda müəyyən edilmiş qaydada Mərkəzi Seçki Komissiyasına barəsində məlumat təqdim edilməmiş ianə üzrə siyasi partiya tərəfindən bank əməliyyatları və ya hər hansı digər əməliyyat aparılmasına görə vəzifəli şəxslər 2 000 manatdan 3 000 manatadək məbləğdə, hüquqi şəxslər 6 000 manatdan 8 000 manatadək məbləğdə cərimə olunacaq.

Qeyd edək ki, qanuna görə, ianə – siyasi partiya qarşısında hər hansı məqsədə nail olmaq vəzifəsi qoymadan ona Azərbaycan Respublikasının vətəndaşları tərəfindən pul və ya digər əmlak şəklində verilən vəsait, habelə digər formada göstərilən maddi yardımdır.

Siyasi partiya yalnız Azərbaycan Respublikasının vətəndaşlarından ianə qəbul edə bilər.

Siyasi partiya qəbul etdiyi və ya vəd edilən ianə müqabilində, ianə verən şəxsə və ya hər hansı digər şəxsə birbaşa, yaxud dolayı yolla maddi və sair nemət, hər hansı imtiyaz və ya güzəşt verə bilməz, belə təkliflə çıxış edə və ya belə vəd verə bilməz.İanə pul vəsaiti və ya digər əmlak şəklində qəbul edilə bilər.

Bəzi sosial şəbəkə istifadəçilərinə görə, bu təkliflə əslində Azərbaycan Respublikasında yox dərəcəsində olan müxalifəti daha da sıxışdırmaq üçün növbəti qanuni baza yaradılır.

Bəziləri bildirir ki, dövlət məmurlarının böyük məbləğdə talançılıqlarını görməyən hakimiyyətin partiyalara belə həssaslığı müxalif fəaliyyətlərini susdurmaq üçün nəzərdə tutulub. Onlara görə narkotik maddəsinin istənilən inanclı vətəndaşları cəzalandırmaq üçün düzəldiyi kimi, ianə maddəsi ilə də istənilən siyasi müxalifə şər və böhtan atmaq imkanlarını genişləndirmək və çeşidli etmək istəyirlər.