Azərbaycan MN: Ermənistan atəşkəsi pozmaqda davam edir
Azərbaycan MN: Ermənistan atəşkəsi pozmaqda davam edir
Azərbaycan Müdafiə Nazirliyi Ermənistan silahlı qüvvələri ilə təmas xətti və cəbhədəki son vəziyyətlə bağlı məlumat yaydı.
SəhərAzəri xəbər verir, Azərbaycan Müdafiə Nazirliyinin mətbuat xidmətindən verilən məlumata əsasən Ermənistan silahlı qüvvələrinin bölmələri cəbhənin müxtəlif istiqamətlərində iriçaplı pulemyotlardan və snayper tüfənglərindən də istifadə etməklə sutka ərzində atəşkəs rejimini 35 dəfə pozub.
Azərbaycan MN bildirib ki, Ermənistan Respublikası Berd rayonunun Ayqepar, Çinari və Ayqedzor kəndlərində yerləşən mövqelərdən Tovuz rayonunun Əlibəyli, Ağdam, Koxanəbi və Muncuqlu kəndlərində, Çəmbərək rayonu ərazisindəki adsız yüksəkliklərdə yerləşən mövqelərdən Gədəbəy rayonunun Zamanlı kəndində və adsız yüksəkliklərdə yerləşən Azərbaycan ordusunun mövqeləri atəşə tutulub.
Tərtər rayonunun işğal altında olan Çiləbürt, Ağdam rayonunun Yusifcanlı, Mərzili, Füzuli rayonunun Qaraxanbəyli, Horadiz kəndləri yaxınlığında, həmçinin Tərtər və Xocavənd rayonları ərazisindəki adsız yüksəkliklərdə yerləşən mövqelərdən də Azərbaycan ordusunun mövqeləri atəşə tutulub.
