Komitə sədri həyəcan təbili çaldı
“Daha çox azərbaycanlı xarici münaqişələrə cəlb olunur”
Azərbaycan Respublikası Milli Məclisinin İnsan hüquqları komitəsinin sədri ölkə vətəndaşlarının muzdlu qismində Ukrayna-Rusiya münaqişəsinə cəlb olunması barədə xəbərdarlıq edib.
Milli Məclisində çıxışı zamanı deputat Zahid Oruc bildirib ki, son dövrlərdə Rusiya–Ukrayna müharibəsində muzdlular kimi döyüşmək üçün azərbaycanlıların cəlb edilməsi halları getdikcə artır.
Onun sözlərinə görə, kütləvi informasiya vasitələrində müharibənin hər iki tərəfində döyüşən onlarla azərbaycanlının həlak olması və ya itkin düşməsi ilə bağlı narahatedici məlumatlar yayılır və muzdluluq fəaliyyəti üçün Azərbaycan vətəndaşlarının cəlb olunması halları artır.
Zahid Oruc qeyd edib ki, xarici kəşfiyyat mərkəzləri ilə birbaşa əlaqəli olan sosial şəbəkə səhifələri vasitəsilə məqsədli reklam kampaniyaları aparılır. Bu kampaniyalar “müqaviləli xidmət”, “iş” və ya “təlim” adı altında həyata keçirilir.
Deputat vurğulayıb ki, rəsmi statistika mövcud olmasa da, hərbi təşkilatların məlumatlarına əsasən, yüzlərlə Azərbaycan vətəndaşı hazırda səngərlərdə döyüşür.
Zahid Oruc sonda deyib ki, ən böyük itki məhz Qarabağ müharibəsində döyüş təcrübəsi qazanmış şəxslərin aylıq ödəniş qarşılığında döyüşlərə cəlb olunmasıdır.
