Ukraynanın müdafiə qüvvələri cəbhənin müxtəlif istiqamətlərində Rusiya Silahlı Qüvvələrinin hücumuna müqavimət göstərildiyini iddia edirlər.

SəhərAzəri-nin məlumatına əsasən, Ukraynanın Müdafiə Nazirliyi feysbuk səhifəsində bildirib ki, Xarkov və Axtırka şəhərləri müdafiə olunur: “Əsas səylər rəqibin cənub-şərq istiqamətində hərəkətinin qarşısının alınmasına yönəlib. Mariupolun dairəvi müdafiəsi ilə yanaşı, Belarus ilə dövlət sərhədinin bağlanması, Siverşinedə Çerniqov şəhəri müdafiəsi davam edir”.

Rəsmi məlumata görə, Rusiya qoşunlarının paytaxt Kiyev şəhərinə tərəf hərəkətinin qarşısının alınması üzrə tədbirlər görülür. Şəhərin müdafiə qüvvələri rəqibin hücumlarını dəf etməyə hazır vəziyyətdədir.

Qeyd olunub ki, cənub istiqamətində Rusiya Silahlı Qüvvələri Krivoy Roq, Nikolayev, Voznesensk və Xerson vilayətinin Novoronsovka qəsəbəsində sıxışdırılır.

Başqa istiqamətlər qoşun dəstələri sabitlik və ərazinin müdafiəsi üzrə əməliyyatlar keçirir.

Nazirliyin informasiyasına əsasən, Ukrayna Silahlı Qüvvələri Rusiya qoşunlarının raket bomba zərbələrinin qarşısını alır, ölkənin vacib obyektlərini və qoşun bölmələrini hava hücumundan müdafiə edir. Son iki gündə Rusiyanın dörd “Su-25” qırıcısı və iki helikopteri məhv edilib.

“Onların irəliləmək sürəti zəifləyib, Rusiya ordusunun şəxsi heyəti ruh düşkünlüyü yaşayır. Rusiya Silahlı Qüvvələrinin hissələri arasında öz başınalıq və talan halları əhəmiyyətli dərəcədə artıb”, - deyə Ukrayna Müdafiə Nazirliyindən bildirilib.

Müdafiə nazirliyi həmçinin müharibənin 15-ci günündə Rusiya ordusunun itkilərini açıqlayıb.

Bildirilir ki, yenilənən məlumatda rus ordusu 12 mindən çox canlı qüvvə itkisi verib.

Məlumatda qeyd edilib ki, Rusiya 335 tank, 123 artilleriya sistemi, 29 hava hücumundan müdafiə sistemi, 49 təyyarə, 81 helikopter, 526 avtomobil, 3 kater, 60 yanacaq sisterni və 7 PUA-nı itirib.

Qeyd edək ki, Rusiya Silahlı Qüvvələrinin Ukraynada hərbi əməliyyatlara başlamasının 15-ci günüdür.