Rusiya prezidenti rus xalqını təriflədi
Putin: Çoxdan belə birlik görməmişdik!
Rusiya prezidenti Ukraynaya hərbi müdaxiləyə toxunaraq rus bayraqlarını dalğalandıran on minlərlə insana Kremlin bütün məqsədlərinə çatacağına söz verib.
SəhərAzəri-nin məlumatına əsasən, Vladimir Putin dünən futbol stadionunda keçirilən mitinqdə deyib: “Biz nə etməli olduğumuzu, bunu necə və nəyin bahasına etməli olduğumuzu bilirik. Və biz bütün planlarımızı mütləq yerinə yetirəcəyik”.
Onun sözlərinə görə, Rusiyanın Ukraynada keçirdiyi "xüsusi hərbi əməliyyat"da döyüşən əsgərlər Rusiyanın birliyini nümayiş etdirib.
"Onlar çiyin-çiyinə bir-birinə kömək edir, bir-birinə dayaq olur və lazım olanda qardaş kimi bədənləri ilə bir-birlərini güllədən qoruyurlar. Çoxdandır ki, bizdə belə birlik olmayıb" – deyə, Rusiya lideri vurğulayıb.
Putin deyir ki, Ukraynadakı əməliyyat ona görə lazım idi, çünki ABŞ bu ölkə vasitəsilə Rusiyanı təhdid etmək üçün istifadə edirdi və Rusiya rusdilli insanları Ukraynanın “soyqırımı”ndan müdafiə etməli idi.
Qeyd edək ki, Putinin çıxış etdiyi səhnə Ukraynadakı hərbi əməliyyatlarda istifadə olunan “Z” işarəsindən istifadə olunaraq “Nasizm olmayan dünya üçün” və “Prezidentimiz üçün” şüarları ilə bəzədilib.
