Rusiya Ermənistanın KTMT hərbi təlimlərinə ev sahibliyi etməkdən imtina etməsinə münasibət bildirib.

Kremlin sözçüsü Dmitri Peskov bildirib ki, Rusiya Ermənistanın 2023-cü ildə KTMT-nin hərbi təlimlərinə ev sahibliyi etməkdən imtina ilə bağlı bəyanatına aydınlıq gətirməyi planlaşdırır.

Hökumət rəsmisi RİA Novosti-yə deyib: “Bu, Ermənistanın baş nazirinin son bəyanatıdır. “Düşünürəm ki, KTMT-dəki tərəfdaşlarımız təmasda olacaq, Ermənistanın mövqeyi ilə bağlı detalları aydınlaşdıracaq. Hər halda Ermənistan bizim çox yaxın müttəfiqimizdir. Biz dialoqu, o cümlədən indi çox mürəkkəb olan məsələlərlə bağlı davam etdirəcəyik”.

Xatırladaq ki, Nikol Paşinyan Kollektiv Təhlükəsizlik Müqaviləsi Təşkilatının sülhməramlı qoşunlarının birgə hərbi təliminin bu il Ermənistanda baş tutmayacağını bildirmişdi.

“Ermənistan Respublikasının müdafiə naziri artıq KTMT-nin birgə qərargahına yazılı şəkildə məlumat verib ki, biz bu vəziyyətdə Ermənistan Respublikasında belə hərbi təlimlərin keçirilməsini məqsədəuyğun hesab etmirik. Və bu hərbi təlimlər ən azı bu il ölkəmizdə baş tutmayacaq”, –  deyə Paşinyan vurğulamışdır.

Rəsmi İrəvan Rusiyanın Laçın dəhlizini açmaması və Əliyev hakimiyyəti qarşısında tolerantlıq göstərməsindən narazıdır.