SAHAR

Nigeriya İslam Hərəkatının üzvləri ölkə paytaxtı Abucada daha bir aksiya keçirib və öz liderləri, yəni Şeyx İbrahim Zəkzakinin azad olunmasını tələb ediblər.

Press TV-nin məlumatına görə, Nigeriya İslam Hərəkatının üzvləri Şeyx Zəkzakinin azad olunması məqsədilə keçirilən aksiyada iştirak ediblər. Nigeriyada keçirilən oxşar aksiyaların sayı artmaqdadır. Bu aksiyalarda yüzlərlə nəfər iştirak edib. Etirazçılar Abuca küçələrində yürüş keçirib və öz liderləri, Şeyx İbrahim Zəkzaki və həyat yoldaşı Zinətin həbsinin davam etməsini pisləyən şüarlar səsləndiriblər. Onlar Nigeriya hökumətinin Şeyx Zəkzakinin azadlığı üzrə istənilən tələblərə və onların etirazlarına göz yummasını tənqid ediblər. 

Nigeriya İslam Hərəkatının üzvlərindən və aksiya iştirakçılarından Abdulla Zanqo deyib: Bizi həbsə atın, məni törətmədiyim cinayətə görə suçlayın. Onların bizim qanuni və hüquqi tələblərimizi eşidəcək qulaqları yoxdur. Liderimizin sağlamlıq durumu ağırdır. O ağır şəraitdədir. O tibbi səbəblərə görə azad olunmalı və müalicə edilməlidir. Onu bu gün azad edərsəniz, bizi sabah burada görməyəcəksiniz. 

Nigeriya İslam Hərəkatının üzvləri deyirlər ki, Nigeriya hökuməti Ali Federal Məhkəmənin qərarını pozmağı davam etdirir. Çünki bu məhkəmə Şeyx Zəkzakinin dərhal azad edilməsinə qərar verib. Nigeriya Ədliyyə Nazirliyinin qarşısında keçirilən aksiyada etirazçılar bildiriblər ki, vətəndaşlar hələ də qəzəblidirlər və elə buna görə, hər gün aksiyalara çoxlu sayda insan qatılır. 

Nigeriya İslam Hərəkatının üzvlərindən Məhəmməd İbrahim Qamava deyib: Hər bir Nigeriya vətəndaşının etiraz haqqı vardır. Ölkədə keçirilən aksiyalar dinc aksiyalardır. Biz heç vaxt problem yaratmırıq. Dediyim kimi, dinc etiraz aksiyalarının keçirilməsi davam edəcək. Nigeriya konstitusiyasına əsasən etiraz aksiyası keçirmək haqqımız vardır. Biz hökumətə bu mesajı çatdırmaq istəyirik ki, Şeyx Zəkzaki azad olunmalıdır. Biz bu haqda heç bir tolerantlıq göstərməyəcəyik. 

Etirazçılar deyirlər ki, Nigeriya konstitusiyasına əsasən, bir şəxsi 48 saatdan çox həbs etmək qeyri-qanuni hərəkətdir. Elə buna görə, hökumət heç bir şərt olmadan Şeyx Zəkzakini azad etməlidir.