Putin: Rusiya Belarusda taktiki nüvə silahı yerləşdirəcək
Rusiya prezidenti Vladimir Putin şənbə günü Moskvanın qonşu Belarusda taktiki nüvə silahı yerləşdirmək planlarını açıqlayıb.
SəhərAzəri-nin məlumatına əsasən, Putin deyib: "Moskva qonşu Belarusla öz ərazisində taktiki nüvə silahı yerləşdirmək üçün müqavilə bağlayıb".
Belarusla razılaşmanın nüvə silahının yayılmaması ilə bağlı beynəlxalq öhdəlikləri pozmadığını deyən Putin, ABŞ-ın onilliklər ərzində öz avropalı müttəfiqlərinin ərazisində nüvə silahı yerləşdirdiyini bildirib.
Putin bunu şənbə günü Ukrayna müharibəsi ilə bağlı Qərblə gərginliyin artdığı və bəzi rusiyalı şərhçilərin mümkün nüvə zərbələri ilə bağlı fərziyyələri fonunda bildirib.
Taktiki nüvə silahları döyüş meydanında istifadə üçün nəzərdə tutulub və uzaq mənzilli raketlərə quraşdırılmış daha güclü nüvə başlıqları ilə müqayisədə qısa mənzilli və aşağı məhsuldarlığa malikdir.
Putin deyib: "Rusiya Belarusa göndərdiyi silahlara nəzarəti saxlamağı planlaşdırır və onlar üçün anbarın tikintisini iyulun 1-dək başa çatdıracaq".
O, Rusiyanın Belarusda nə qədər nüvə silahı saxlayacağını açıqlamayıb.
ABŞ hökuməti hesab edir ki, Rusiyanın 2000-ə yaxın taktiki nüvə silahı, o cümlədən taktiki təyyarələrin daşıya biləcəyi bombalar, qısa mənzilli raketlər üçün döyüş başlıqları və artilleriya mərmiləri var.
