Amerika nəşri Yaxın Şərqdə baş verməkdə olan olayları şərh edib
İranın İsrailə yeni hücumu daha güclü və gözlənilməz ola bilər
İranın sionist İsrailə yeni hücumu apreldə olduğundan daha güclü və gözlənilməz ola bilər, çünki Tehran öz planları barədə heç kimə məlumat vermir.
Bu barədə “The Wall Street Journal” yazıb.
Nəşr bildirib ki, İran son dəfə yəhudi dövlətinə doğru 300-dən çox PUA və raket atıb. Lakin diplomatları əvvəlcədən xəbərdar edib. Nəticədə ABŞ və İsrailə hazırlaşmaq şansı əldə edib. Odur ki, atılan raketlərin əksəriyyəti tutulub. Bu dəfə İsrail və müttəfiqləri daha ağır şəraitlə üzləşə bilərlər.
“The Wall Street Journal”ın yazdığına görə, Yaxın Şərqdə gərginliyin qarşısını almağa çalışan amerikalı və ərəb diplomatları öldürülən HƏMAS Siyasi bürosunun rəhbəri İsmayıl Həniyyənin və “Hizbullah”ın hərbi qanadının komandirlərindən biri Fuad Şükrün qisasını almağa hazırlaşan İran və Hizbullahın qəzəbli susqunluğu ilə üzləşiblər.
Amerika administrasiyasının adının açıqlanmasını istəməyən nümayəndəsinin nəşrə verdiyi məlumata görə, Vaşinqton hələ də ehtiyatlı davranır, zərbələrin isə yaxın günlərdə baş verməsi istisna deyil.
Bundan əvvəl Pentaqon İsraili qorumaq üçün Yaxın Şərqə əlavə qüvvələr, o cümlədən ballistik raketlərdən müdafiəni təmin edə bilən kreyserlər və esmineslər göndərdiyini açıqlamışdı.
ABŞ həmçinin xunta rejimini qorumaq üçün əlavə yerüstü ballistik raket əleyhinə müdafiə sistemləri yerləşdirməyə hazırlaşır.
