Tokyo-2020 Olimpiya yarışlarında
Azərbaycanın medalları 6-ya yüksələcək
Azərbaycan milli komandasının Tokio-2020 Yay Olimpiya Oyunlarında daha bir medal qazanacağı dəqiqləşib.
SəhərAzəri-nin Apasport.az-a istinadən verdiyi məlumata görə, bu mükafatı yarımfinala vəsiqə qazanan qadın karateçi İrina Zaretska təmin edib.
+61 kq çəki dərəcəsində yer alan dünya və Avropa çempionu B qrupunda keçirdiyi 4 döyüşün 3-də qalib gəlib, 1-də məğlub olub. 6 xal toplayan 25 yaşlı karateçi qrup birincisi kimi yarımfinala yüksəlib. Bu isə o deməkdir ki, Zaretskla Olimpiyada minimum bürünc medal qazanacaq.
Bununla Azərbaycan Respublikasının Olimpiyadakı medal sayının ən azı 6-ya yüksələcəyi dəqiqləşib.
Qeyd edək ki, bunadək karateçi Rafael Ağayev (75 kq) gümüş, cüdoçu İrina Kindzerska (+78 kq), boksçu Alfonso Dominqes (81 kq) və yunan-Roma güləşində Rafiq Hüseynov (77 kq) bürünc medal qazanıb. Sərbəst güləşçi Hacı Əliyev (65 kq) isə finala yüksəlməklə özü üçün ən azı gümüş mükafatı təmin edib.
