Qaz yataqlarının kəşfiyyatında terror dövlətinin SOCAR-a etibar etməsinin səbəbi bilindi
Fələstin qazını oğurlayan İsrail özünə şərik axtarırmış
Aralıq Dənizində Qəzzə zolağına yaxın sahillərdə qaz yataqlarının kəşfiyyatı işində terror dövlətinin SOCAR-a etibar etməsinin sirri üzə çıxır.
Qlobal Araşdırma Və Təhlil Mərkəzi Ceymstaun Fondunun əməkdaşı Rəhim Rəhimovun həmin fondun vebsaytı üçün qələmə aldığı məqalədə deyilir: “İsrailin tenderi vaxtından əvvəl elan etməsi bəziləri tərəfindən sadə bir səhv deyil, siyasi mesaj kimi qiymətləndirilib. İsrailin energetika və infrastruktur naziri İsrael Katz sazişin arxasında duran siyasəti təkrarlayaraq bəyan edib ki, Azərbaycanla olduğu kimi qaz kəşfiyyatı müqavilələri İsrailin enerji təhlükəsizliyinin və İsrailin beynəlxalq əlaqələrinin gücləndirilməsinə töhfə verəcək”.
Müəllifin fikrincə, Təl-Əviv Aralıq dənizindəki zəngin qaz yataqlarının mərkəzi inkişaf etdiricisi kimi öz legitimliyini fəal şəkildə təbliğ edir. Bəzi türk şərhçiləri Qəzzədəki döyüşlərdən İsrailin fələstinliləri dənizdəki qaz yataqlarına hər hansı girişdən məhrum etmək niyyətini vurğulamaq üçün istifadə ediblər.
Ceymstaun Fondunun əməkdaşı öz məqaləsində bildirir ki, Türkiyə prezidenti Rəcəb Təyyib Ərdoğan noyabrın 3-də Qazaxıstanda keçirilən Türk Dövlətləri Təşkilatının sammiti çərçivəsində Əliyevlə bu məsələni gündəmə gətirib. O, azərbaycanlı həmkarına deyib ki, “dünya İsrailin beynəlxalq hüquqa uyğun hərəkət etməsini təmin etmək üçün daha güclü mesajlar göndərməlidir”. Həmin görüşün başqa təfərrüatları açıqlanmayıb.
Müəllif sonra qeyd edir ki, İsrailin enerji təhlükəsizliyinin zəifliyi Qəzzədəki müharibə ilə daha aydın oldu. Noyabrın əvvəlində İranın Ali Rəhbəri Ayətullahül-üzma Əli Xamenei müsəlman xalqları İsraili “Qəzzənin bombardmanını dərhal dayandırması üçün sionist rejimə neft və digər malların ixracını dayandırmağa” çağırıb. İranın xarici işlər naziri Hüseyn Əmir-Abdullahiyan da Ankaraya son səfəri zamanı demək olar ki, eyni bəyanatla çıxış edib. Tehranın mövqeyi həm də İsrailin əsas neft tədarükçüsü kimi Azərbaycana xəbərdarlıqdır.
Məqalədə vurğulanır ki, İsrail-Həmas müharibəsi Bakının ənənəvi xarici siyasətinə meydan oxuyur, çünki yaxın regional müttəfiqlər münaqişənin əks tərəflərində dayanır. Qəzzədə müharibə davam etdikcə, Bakı üçün İsrail və daha geniş müsəlman dünyası ilə münasibətlər arasında tarazlığı tənzimləmək getdikcə çətinləşəcək. Bu kontekstdə SOCAR-a qaz kəşfiyyatı tenderini verməklə İsrail Azərbaycanın başqa bir iqtisadi tərəfdaş deyil, əsas geosiyasi müttəfiq olaraq qaldığını göstərmək istəyib.
