Abu-Dabi raket hücumlarının hədəfinə çevriləcək
-
Abu-Dabi raket hücumlarının hədəfinə çevriləcək
Yəmən Ənsarullah hərəkatının sözçüsü deyib: Birləşmiş Ərəb Əmirliklərinin paytaxtı Abu-Dabi gələcəkdə Yəmən ordusu və xalq komitələrinin raket hücumlarının əsas hədəfinə çevriləcək.
Əl-Cəzirə telekanalının verdiyi məlumata görə, Məhəmməd Əbdüssalam bu telekanala açıqlamasında Yəməndə Ənsarullah hərəkatını Livanda Hizbullah hərəkatına bənzədən Səudiyyə Ərəbistanının vəliəhdi Məhəmməd Bin Salmanın sözlərinə münasibət bildirərək deyib: Məhəmməd Bin Salmanın bu bənzətməsi, Səudiyyə Ərəbistanının da sionist rejimə bənzədilməsinə gətirib çıxarır. Husilər Yəmən hizbullahı deyillər, haqlı və ədalətli tələbləri olan xalqın bir hissəsidirlər.
O deyib: Yəmən Səudiyyə Ərəbistanı və BƏƏ-nin təcavüzkarlığı və Yəmənə qarşı blokada üzündən insani və iqtisadi böhranla üz-üzədir və bu baxımdan Yəmənin şimalı ilə cənubu arasında fərq yoxdur. Yəmənin cənubu Səudiyyə Ərəbistanı və BƏƏ-nin işğalındadır, amma Ənsarullahın nəzarətində olan ərazilərdə əhali izzətlə yaşayır. Yəmənə hücum regionda tayfa müharibəsi yaratmaq istiqamətində ABŞ və sionistlərin beynəlxalq planının bir hissəsidir və Səudiyyə Ərəbistanı Babül-Məndəb boğazını ələ keçirmək məqsədi ilə bu planın icrası üçün vasitə rolunu oynayır.
Ənsarullahın sözçüsü deyib: Yəmən hava, quru və dəniz mühasirəsindədir amma özünün ballistik raket gücünü inkişaf etdirə bilib. Abu-Dabini raketlə hədəfə almaq üçün ilkin sınaq həyata keçirildi və gələcəkdə daha ətraflı təşəbbüslər həyata keçiriləcək.
Məhəmməd Əbdüssalam İranın Yəmənə raket göndərilməsində ittiham edilməsi barədə verilən sualı belə cavablandırıb: Tehranın rolunun şişirdilməsi Səudiyyə koalisiyasının aşkar səhvidir və Yəmən xalqına qarşı qələbənin reallaşmasında öz acizliyini əsaslandırmaq istəyir.
Əbdüssalam deyib: Ənsarullah Səudiyyə Ərəbistanı sərhədlərində və ərazilərində hərbi mövqelərinə hücumlarını davam etdirəcək. Abu-Dabi isə Yəmənin cənubunu işğal edib və xalqı qətlə yetirir və Yəmənin adaları və su yollarına nəzarəti davam etdirir, bütün bunlara görə şübhəsiz ki, Yəmənin raket hücumlarında ilk hədəflərdən olacaq.
