Rəsmi Bağdad Türkiyəyə etiraz etdi
İraqın suverenliyinin pozulması qınanıldı
İraq hökuməti Türkiyənin İraqın şimalında başlatdığı hərbi əməliyyata münasibət bildirib
SəhərAzəri-nin məlumatına əsasən, rəsmi Bağdad bu qənaətdədir ki, Türkiyənin, İraqın şimalında keçirdiyi hərbi əməliyyatlar bu ölkənin suverenliyini pozur.
Bu barədə İraq Xarici İşlər Nazirliyinin yaydığı bəyanatda deyilir: "Türkiyə qüvvələrinin İraqın şimal bölgələrində İraq torpaqlarını helikopter və pilotsuz təyyarələrlə bombalayaraq həyata keçirdiyi hərbi əməliyyatları şiddətlə qınayırıq. İraq bu addımı öz suverenliyinin və ölkəyə hörmətin pozulması, ölkələr arasında münasibətləri tənzimləyən beynəlxalq müqavilə və qanunları, həmçinin mehriban qonşuluq prinsipini pozan bir hərəkət hesab edir.”
Bəyanatda əlavə edilib: "İraq hökuməti öz ərazisinin heç bir qonşu ölkəyə zərər vermək üçün qərargah və ya dəhliz olmayacağını vurğulayır və İraqın fərqli münaqişələr və digər tərəflər üçün hesablaşma meydanı olmasını rədd edir.”
Qeyd edək ki, Türkiyə iki gündür İraqın şimalında PKK-ya qarşı yeni hərbi əməliyyata başladğını bildirib.
