İran və Azərbaycanın XİN başçıları razılaşdılar
Mövcud problemlər qarşılıqlı dialoq və anlaşma çərçivəsində həll edilməlidir
Azərbaycan Respublikası və İran İslam Respublikasının xarici işlər nazirləri ikitərəfli münasibətlərdə gərginliyin aradan qaldırılması yollarını müzakirə ediblər.
SəhərAzəri-nin məlumatına əsasən, noyabrın 14-də Azərbaycan Respublikasının xarici işlər naziri Ceyhun Bayramov ilə İran İslam Respublikasının xarici işlər naziri Hüseyn Əmir-Abdullahiyan arasında telefon danışığı baş tutub.
Nazirlər ikitərəfli gündəliyin aktual məsələlərini, habelə regional vəziyyəti müzakirə ediblər.
Tərəflər iki ölkə arasında münasibətlərdə yaranmış son vəziyyətin, ictimai ritorika ilə bağlı narahatlığın və digər mövcud problemlərin qarşılıqlı dialoq və anlaşma çərçivəsində həll edilməsinin zəruri olduğunu bildiriblər. Bu xüsusda, Xarici İşlər Nazirliklərinin mətbuat katibləri arasında əlaqə yaradılmasının faydalı ola biləcəyi diqqətə çatdırılıb.
Telefon danışığı zamanı, nazirlər qarşılıqlı maraq doğuran digər məsələlər ətrafında fikir mübadiləsi aparıb və təmasların davam etdirilməsinin vacib olduğunu qeyd ediblər.
