İranın neft nazirinin Azərbaycana səfəri başlayıb
Cavad Ovci Azərbaycanla əməkdaşlığın nəticələrini yüksək qiymətləndirir
İran İslam Respublikasının neft naziri Bakıda keçirilən Enerji Forumunda iştirak edir.
SəhərAzəri-nin məlumatına əsasən, Cavad Ovci üç günlük səfər çərçivəsində ikitərəfli əlaqələrin inkişafına dair danışıqlar aparacaq, regional və beynəlxalq əməkdaşlıq perspektivlərini müzakirə edəcək.
Həmçinin Azərbaycan və İran arasında Xəzər dənizində neft və qaz yataqlarının işlənməsinə dair yeni anlaşmaların imzalanacağı gözlənilir.
Məlumatda qeyd olunur ki, iyunun 1-də Azərbaycan baş nazirinin müavini Şahin Mustafayevlə Cavad Ovcinin görüşündə Türkmənistan qazının İran üzərindən Azərbaycana nəqli layihəsinin həyata keçirilməsinin əhəmiyyəti diqqətə çatdırılıb.
Görüşdə Azərbaycanla İran arasında müxtəlif sahələrdə, xüsusilə iqtisadiyyat, ticarət, sərmayə qoyuluşu, nəqliyyat-tranzit, enerji, sənaye, kənd təsərrüfatı və digər istiqamətlərdə həyata keçirilən uğurlu əməkdaşlığın nəticələri yüksək qiymətləndirilib.
İki ölkə arasında ali səviyyəli siyasi dialoqun mövcud olduğu bildirildi, Azərbaycan prezidenti İlham Əliyev ilə İran prezidenti Seyid İbrahim Rəisi arasında mütəmadi təmasların dövlətlərarası münasibətlərin möhkəmləndirilməsi baxımından önəmi vurğulanıb.
C.Ovci İranın Azərbaycanın suverenliyini və ərazi bütövlüyünü hər zaman dəstəklədiyini diqqətə çatdırıb.
Eyni zamanda yüksək səviyyəli qarşılıqlı səfərlərin, eləcə də tərəflər arasında əldə olunmuş razılaşmaların və imzalanmış sənədlərin əməkdaşlığın genişləndirilməsinə mühüm töhfə verdiyi diqqətə çatdırılıb.
Bölgədə yaranmış yeni reallıqların əməkdaşlıq üçün yaxşı imkanlar yaratdığı qeyd edilib. Bu baxımdan iki ölkə arasında martın 11-də imzalanmış İran İslam Respublikasının ərazisindən keçməklə Azərbaycan Respublikasının Şərqi Zəngəzur iqtisadi rayonu ilə Naxçıvan Muxtar Respublikası arasında yeni kommunikasiya bağlantılarının yaradılması haqqında Anlaşma Memorandumunun önəmi vurğulanıb.
Görüşdə, həmçinin qarşılıqlı faydalı əməkdaşlığın müxtəlif sahələrdə daha da genişləndirilməsi perspektivləri müzakirə olunub, enerji sektorunda həyata keçiriləcək bir sıra yeni layihələrə dair fikir mübadiləsi aparılıb.
