Rusiyalı hərbi ekspert Azərbaycan rəhbərliyinin mövqeyini şərh edib
Vladimir Yevseyev: Bakı Minsk Qrupu olmadan İrəvanla sülh sazişi axtarır
Rusiyalı hərbi ekspert bildirib ki, Bakı İrəvanla ATƏT-in Minsk Qrupu formatında deyil, ikitərəfli və ya hətta üçtərəfli formatda Moskva və ya Brüsselin iştirakı ilə sülh sazişi imzalamağa çalışır.
SəhərAzəri-nin məlumatına əsasən, Vladimir Yevseyev “Armİnfo”ya müsahibəsində deyib: "Son müharibədə qələbə qazanmış ölkə kimi Azərbaycan ATƏT-in Minsk Qrupunun bütün təkliflərini ardıcıl olaraq rədd edir".
Bu kontekstdə Yevseyev qeyd edib ki, 44 günlük müharibədən dərhal sonra Bakı öz maraqlarına uyğun olaraq, eyni zamanda ATƏT-in vasitəçiliyini rədd edərək Moskvanın vasitəçiliyini dəstəkləyib. Lakin Rusiya sülhməramlıları Qarabağda yerləşdirildikdən sonra prezident İlham Əliyev mövqeyinə korrektə etdi və indi Avropa İttifaqının təmsil etdiyi Qərblə həmrəy olaraq Rusiyanın hərbi mövcudluğunun əleyhinə danışır.
Ekspertin fikrincə, Qərb - ABŞ və Avropa İttifaqı "Minsk Qrupu ilə vidalaşmağa" qətiyyən hazırlaşmır, Rusiya isə müstəqil hərəkətlərini ATƏT-in Minsk Qrupu çərçivəsindəki fəaliyyəti ilə barışdırmağa çalışır. Bu isə o deməkdir ki, Moskva üçtərəfli sazişlər əsasında Bakı və İrəvan qarşısında öz mövqeyini davam etdirmək niyyətindədir.
