Azərbaycanlı politoloq sionist rejimin Suriyaya təcavüzünü şərh etdi:
“Təl-Əviv rejimi nicat yolunu hərbi təcavüzdə görür”
Azərbaycanlı politoloq bildirib ki, Tel Əviv rejimi hərbi təcavüz yolu ilə ətrafında yaratdığı xarabalıqların mərkəzində toxunulmaz qalmağı özünün nicat yolu kimi görür.
Şərq – Qərb Araşdırmalar Mərkəzinin rəhbəri Ərəstun Oruclu öz feysbuk hesabında yazıb: “İsrail öz çevrəsində bütün mümkün olan və hətta olmayan təhdidləri aradan qaldırmaq istəyir. Əsas səbəb isə İsrailin fələstinlilərə qarşı apardığı dağıdıcı siyasətin nəticəsində düşdüyü dərin hərbi, siyasi və iqtisadi böhrandır”.
Politoloq qeyd edib ki, Qəzzə kimi kiçik bir ərazidə faktiki olaraq dinc əhaliyə qarşı aparılan soyqırımı İsrail dövlətinin bütün zəif tərəflərini açıb göstərdi. Məlum oldu ki, İsrail ordusu heç də təqdim olunduğu kimi yüksək döyüş qabiliyyətinə malik deyil. Bu ordu daha çox dinc əhaliyə divan tutan cəza dəstəsidir və onun bugünkü modeli uzunmüddətli savaş üçün nəzərdə tutulmayıb. Bunu dəyişmək isə illər tələb edir.
Ərəstun Oruclu sonra yazıb: “İsrail iqtisadiyyatı dərin böhran içindədir və elə həmin səbəbdən də ölkə vətəndaşlarının əksəriyyəti öz maliyyə ehtiyatlarını xarici ölkələrə çıxarmağa üstünlük verir. İsrail mediası rəsmi mənbələrə istinadla ölkədən çıxarılan vəsaitlərin azı 50% artdığını bildirir. İnsanlar daha çox hökumətin büdcə kəsirlərini aradan qaldırmaq üçün əlavə vergilər tətbiq edəcəyindən və hətta kapitalın "milliləşdirilməsi" istiqamətində addımlar atacağından ehtiyat edərək vəsaitlərini ölkədən çıxarırlar”.
Müəllifin fikrincə, qeyd olunan amillər və İsrailin daxili siyasi vəziyyətində gərginliyin durmadan artması şəraitində müxtəlif cinayətlərdə ittiham olunan Netanyahu hökuməti öz xilas yolunu daimi müharibədə görür.
