İsveçrəlilər Trampın ölkələrinə səfər etməsinə qarşı çıxıblar
Minlərlə nəfər çərşənbə axşamı İsveçrənin Zürix, Cenevrə, Lozanna və Friburq şəhərlərində aksiyalar təşkil edərək, ABŞ prezidenti Donald Trampın Ümumdünya İqtisadiyyat Forumunun Davos şəhərində keçirilən illik iclasında iştirakına etiraz edib.
PressTV-nin verdiyi məlumata görə, aksiya iştirakçıları Ümumdünya İqtisadiyyat Forumunun illik iclasının keçirildiyi Davos şəhərində etiraz aksiyalarının qadağan olunmasını tənqid ediblər.
İsveçrənin müxtəlif şəhərləri ötən günlərdə davamlı olaraq Trampın Davos iclasında iştirakına qarşı xalq etirazlarının şahidi olub.
Bu etiraz aksiyaları əsasən fəhlə sindikatları habelə, Yaşıllar və Sosial Demokrat partiyaları tərəfindən təşkil edilib.
Solçu partiyalar, Sosial Demokratlar, Yaşıllar Partiyasının üzvləri və digər isveçrəli qurum və təşkilatlar son günlər dəfələrlə bildiriblər ki, ABŞ prezidenti Donald Trampın İsveçrəyə səfər etməsinə qarşıdırlar.
Tramp Ümumdünya İqtisadiyyat Forumunun illik iclasında iştirak etmək üçün Davosa səfər edəcək.
Ümumdünya İqtisadiyyat Forumunun illik iclası çərşənbə axşamı İsveçrənin Davos şəhərində bu ölkə prezidentinin çıxışı ilə işə başlayıb. İclas 26 yanvara kimi davam edəcək.
