BMT-nin sülhməramlıları Mərkəzi Afrika Respublikasında öldürülüb
Mərkəzi Afrika Respublikasında (MAR) silahlıların hücumu nəticəsində BMT-nin iki sülhməramlısı öldürülüb.
SəhərAzəri RİA Novosti xəbər agentliyinə istinadən xəbər verir ki, bu barədə BMT-nin Mərkəzi Afrika Respublikasında sabitləşmə üzrə çoxprofilli kompleks missiyası bildirib.
"BMT-nin Mərkəzi Afrika Respublikasında sabitləşmə üzrə çoxprofili kompleks missiyasının qabonlu və mərakeşli iki sülhməramlısı ölkənin cənubunda, Banqasudan (Mbomu prefekturası) 17 kilometr məsafədə onların kolonu silahlı qruplaşmaların koalisiyasının pusqusuna düşərkən öldürülüb", - xəbərdə deyilir.
Missiyanın rəhbəri Mankyor Ndiaye "Mərkəzi Afrika Respublikasında sülh uğrunda İttifaq" və "Antibalaka" silahlı qruplaşmalarının döyüşçüləri tərəfindən təşkil edilmiş hücumu pisləyib. O, qeyd edib ki, BMT-nin missiyası hücumu təşkil edənlərin şəxsiyyətlərinin müəyyənləşdirilməsi və onların məsuliyyətə cəlb edilməsi üçün MAR hakimiyyəti ilə birgə işləyəcək.
