Sanksiyalar Rusiyaya təsir edə bilərmi?
Moskva: Qərbin təzyiqləri Moskvanın mövqeyini dəyişməyəcək
Rusiya XİN-in İqtisadi Əməkdaşlıq Departamentinin direktoru bildirib ki, Moskvanın Qərbin sanksiyalarına reaksiyası operativ və təsirli olacaq.
SəhərAzəri-nin məlumatına əsasən, Dmitri Biriçevski əlavə edib ki, Moskva ABŞ və Avropadan sanksiyaları ləğv etməyi tələb etməyəcək və Qərbin təzyiqləri Moskvanın mövqeyini dəyişə bilməz.
O bildirib: "Sanksiyalar bizim qərarımız deyil. Bunlar etiraf edək ki, ABŞ və peykləri tərəfindən Rusiyaya təzyiq etmək, iqtisadiyyatımızı və sadə rusları çox çətin vəziyyətə salmaq istəyənlər tərəfindən qəbul edilir. Ona görə də bizə təzyiq vasitəsi kimi sanksiyalar, birincisi, qeyri-legitimdir, ikinci növbədə isə nəticə verməyəcək.
Xatırladaq ki, ABŞ, Aİ ölkələri və bir sıra digər dövlətlər, o cümlədən Yaponiya Rusiyaya və Rusiyanın iri şirkətlərinə qarşı yeni sanksiyalar tətbiq edib.
Rusiya Federasiyası Prezidentinin mətbuat katibi Dmitri Peskovun bir qədər əvvəl dediyi kimi, Qərbin sanksiyaları çox ciddidir, Rusiya onlara əvvəlcədən hazırlaşırdı. Peskov deyib ki, Rusiyanın maraqlarına cavab verən cavab tədbirləri hazırlamaq üçün qurumların əlaqələndirilməsi tələb olunur.
Rusiya Xarici İşlər Nazirliyi sanksiyalara qarşı bütün istiqamətlərdə cavab tədbirləri üzərində iş aparıldığını deyir. Artan məhdudiyyətlər fonunda Rusiya tərəfi valyuta ehtiyatlarında və xarici hesablaşmalarda dollardan istifadəni azaldıb, qeyri-Qərb kapital bazarlarına keçir, həmçinin investisiya layihələrini xarici mənfi təsirlərdən qorumaq üçün səylər göstərir.
Bununla belə "Rossiya- 1" telekanalına müsahibəsində Rusiyanın maliyyə naziri Anton Siluanov məlumat verib ki, Qərbin sanksiyaları Rusiyanı öz qızıl valyuta ehtiyatlarının yarısına çıxışdan məhrum edib, bu da təxminən 300 milyard dollar deməkdir.
"Bizim ehtiyatlarımızın ümumi həcmi təxminən 640 milyard dollar təşkil edir, bunun təxminən 300 milyard dolları elə vəziyyətdədir ki, biz onlardan istifadə edə bilmirik", - "İnterfaks" agentliyi nazirin sözlərindən iqtibas gətirib.
Siluanovun sözlərinə görə, Rusiyanın ehtiyatlarının dondurulması ucbatından öhdəliklərin, xüsusilə borclarla bağlı öhdəliklərin icrasında problemlər yaradıb.
Nazir əlavə edib ki, Rusiyanın qızıl valyuta ehtiyatlarının bir hissəsi yuan formasında saxlanılır. Bu ehtiyatlar hələ dondurulmayıb. Lakin Qərb Çini də məcbur edir ki, Rusiyanın öz valyutasına çıxışını məhdudlaşdırsın.
