United Airlines-a məxsus təyyarənin mühərrikində yanğın baş verib: Sərnişinlər ölümdən dönüblər
Bazar günü səhər ABŞ-ın Hyuston şəhərindən Nyu-Yorka uçan United Airlines şirkətinə məxsus təyyarə havaya qalxmağa hazırlaşarkən, mühərrikində yanğın baş verib, bu da, sərnişinlər arasında panikaya səbəb olub və təyyarə təcili təxliyə edilib.
Təyyarənin göyərtəsində 104 sərnişin və beş ekipaj üzvü olub.
Şahidlər təyyarənin sağ qanadından alov və qalın tüstü çıxdığını gördüklərini bildiriblər. Sərnişinlərdən biri tərəfindən çəkilən videoda dəhşət içində olan bir sərnişinin “Lütfən, bizi buradan çıxarın” qışqırması eşidilir.
Pilot dərhal havaya qalxma əməliyyatını dayandırıb və sərnişinlər sürüşmə və pilləkənlər vasitəsilə təcili təxliyyə edilib və avtobusla terminala aparılıb. Hadisə nəticəsində xəsarət alan olmayıb.
ABŞ Federal Aviasiya İdarəsi qəzanın səbəbləri ilə bağlı araşdırmalara başladığını açıqlayıb.
Bu hadisə elə bir şəraitdə baş verib ki, ABŞ-da uçuş təhlükəsizliyi ilə bağlı narahatlıqlar artıb. Son həftələr ərzində bu ölkədə iki ölümcül təyyarə qəzası baş verib. Vaşinqtonda sərnişin təyyarəsinin hərbi helikopterlə toqquşması nəticəsində göyərtəsində olanların hamısı həlak olub. Həmçinin Filadelfiyada kiçik şəxsi təyyarə yaşayış məntəqəsinə çırpılıb, nəticədə 7 nəfər həlak olub.
Aviasiya sənayesi mütəxəssisləri hesab edir ki, idarəetmə qüllələrində işçi qüvvəsinin çatışmazlığı, hava nəqliyyatı donanmasının köhnəlməsi və uçuş trafikinin artması kimi amillər hava səyahətlərinin təhlükəsizliyinə mənfi təsir göstərə bilər. Bu hadisələrdən sonra ABŞ Federal Aviasiya İdarəsi uçuşların təhlükəsizliyi standartlarını nəzərdən keçirmək və təkmilləşdirmək üçün xüsusi komanda yaratdığını açıqlayıb.
