Türkiyənin ədliyyə naziri cümə axşamı İzmirdə 2 nəfərin ölməsi ilə nəticələnən partlayış və silahlı hücumla əlaqədar 18 nəfərin həbs edilməsindən xəbər verib.

Röyters-in məlumatına görə, Türkiyənin ədliyyə naziri Bəkir Bozdağ həmçinin bildirib ki, bu terror aktının PKK tərəfindən törədilməsi ilə bağlı heç bir şəkk və şübhə yoxdur. 

Cümə axşamı İzmirdə məhkəmə binası yaxınlığında bomba quraşdırılmış bir avtomobilin partladılması 2 nəfərin ölməsi və 3 nəfərin yaralanmasına səbəb olub. Bu hadisədə 2 terrorçu kamikadze də həlak olub. 

Türkiyə polisi cümə axşamı bu xəbəri təsdiq edərək, bildirib ki, terror aktında iştirak edən 3-cü şəxs hadisə yerindən qaçmağa nail olub. 

Bundan öncə yeni milad ili axşamında İstanbulda Reina gecə klubuna edilən hücumda 39 nəfər ölmüş, 69 nəfər isə  yaralanmışdı.