Dövlət Departamenti Blinkenin adından deyilənləri təkzib etdi
Metyu Miller: Bu xəbər dəqiq deyil
Okt 15, 2023 12:44 Asia/Baku
ABŞ Dövlət Departamenti Blinkenin Azərbaycanın tezliklə Zəngəzur mahalını işğal edə biləcəyi ilə bağlı qanunvericilərə xəbərdarlıq etməsi barədə xəbəri təkzib edib.
Politico nəşri keçən həftə iddia etmişdi ki, ABŞ-ın dövlət katibi Entoni Blinkenin qanunvericilərlə görüşdə Azərbaycanın yaxın həftələrdə Ermənistana qarşı hücuma keçə biləcəyi ilə bağlı məlumat verib.
ABŞ Dövlət Departamentinin sözçüsü Metyu Miller Armenpress-ə verdiyi yazılı şərhdə bildirib ki, bu xəbər dəqiq deyil və Blinkenin qanunvericilərə dediklərini heç bir şəkildə əks etdirmir.
Miller deyib: “Birləşmiş Ştatlar Ermənistanın suverenliyini və ərazi bütövlüyünü qətiyyətlə dəstəkləyir. Çünki onun suverenliyi və ərazi bütövlüyünün pozulması ciddi nəticələrə gətirib çıxaracaq”.
