Haaqa məhkəməsi Avropanın mərkəzində təhqir edildi
Avropa Birliyi nadir bir reaksiyada, Macarıstanın Beynəlxalq Cinayət Məhkəməsinin sionist rejimin baş naziri Benyamin Netanyahunun həbs olunması barədəki hökmünə məhəl qoymamasını tənqid atəşinə tutub.
Haaqa Məhkəməsinin qərarlarının qeyd-şərtsiz olaraq icra edilməsi vacibliyinə təkid edən Avropa Birliyi, bütün üzv ölkələri öz beynəlxalq öhdəliklərinə sadiq qalmağa çağırıb.
Avropa Komissiyasının baş sözçüsü Anitta Hipper bu orqanın Brüsseldə keçirilən gündəlik mətbuat konfransında bir jurnalistin sionist rejimin baş nazirinin Budapeştə ehtimal olunan səfəri və Macarıstan dövlətinin Beynəlxalq Cinayət Məhkəməsinin sionist rejimin baş nazirinin bir cani kimi həbs olunması barədəki hökmünü icra etməkdən boyun qaçırmasına dair sualının cavabında belə deyib: Bizim Beynəlxalq Cinayət Məhkəməsi qarşısındakı mövqeyimiz tamamilə aydındır.
Avropa Birliyi Beynəlxalq Cinayət Məhkəməsini və Roma Əsasnaməsində dərc olunan prinsipləri himayə edir. Biz həmçinin bu orqanın müstəqilliyi və tərəfsizliyinə hörmət edirik. Biz cəzadan toxunulmazlıqla mübarizəyə və beynəlxalq cinayət ədalətinə qəti şəkildə sadiqik.
Avropa Şurasının bəyanatına toxunan Anitta Hipper, əlavə edib: Biz bütün ölkələrdən həbs qərarlarının dərhal icra edilməsi yolu da daxil olmaqla məhkəmə ilə tam əməkdaşlıq etmələrini istəyirik.
Hipper Macarıstanın Beynəlxalq Cinayət Məhkəməsindən çıxmaq üzrə ehtimal olunan qərarına dair məlumatlar haqdakı sualı isə belə cavablandırıb: Bizə Macarıstanın belə bir rəsmi qərarı haqda məlumat daxil olmayıb. Amma təbiidir ki, onun baş verəcəyi təqdirdə, dərindən təəssüflənəcəyik.
O, qeyd edib ki, Roma Əsasnaməsinin 127-ci maddəsinə əsasən, məhkəmədən çıxmaq, BMT baş katibinə rəsmi yazılı bildirişlə mümkündür və bu çıxış, rəsmi bildirişdən bir il sonrayadək icra edilməyəcək.
Avropa Komissiyasının baş sözçüsü vurğulayıb: Bir ölkənin məhkəmədən ehtimal üzrə çıxması həmin ölkənin məhkəmə proseslərində məhkəmə ilə həmkarlıq üzrə cari vəzifələrini ləğv etmir.
Avropa Komissiyasının baş sözçüsünün sözlərinin fonunda qeyd edək ki, Macarıstanın baş naziri Viktor Orban açıq şəkildə bildiribdir ki, Netanyahunu Budapeştdə qəbul etməyi planlaşdırır. İş o yerə çatıb ki, o, Beynəlxalq Cinayət Məhkəməsinin Netanyahunun həbsinə dair hökmünü icra etməkən boyun qaçırdığını da dilə gətirib. Bu yanaşma, sözügedən orqana üzv ölkələrin qanuni öhdəlikləri və beynəlxalq ədalət prinsipləri ilə daban-dabana ziddir.
