SAHAR

Minlərlə koreyalı fəal bazar günü Seul şəhərində sionist rejimin səfirliyi qarşısında toplaşaraq, “die-in” (yerə uzanaraq etiraz) aksiyası keçirib və rejimin baş naziri Benyamin Netanyahunun şəklinə ayaqqabı atmaqla Fələstin xalqı ilə həmrəy olduqlarını bildiriblər.

Bu simvolik hərəkət Qəzzədəki mülki qurbanlara dəstək məqsədilə həyata keçirilib və Koreya mediasında və sosial şəbəkələrdə geniş əks-səda doğurub.

Etiraz zamanı iştirakçılar “Dərhal atəşkəs!”, "Fələstini azad edin!" və "Uşaqlara qarşı zorakılığa son" kimi şüarlar yazılmış plakatlar qaldırıblar. Bəziləri əllərində Fələstin bayrağını tutaraq, Qəzzə xalqının müqavimətinə dəstək şüarları səsləndiriblər.

Aksiyanın ən diqqətçəkən anı isə Netanyahunun böyük şəklinə ayaqqabı atılması olub. Etirazçılar bu hərəkəti Qəzzədəki hərbi əməliyyatların davam etməsinə qarşı beynəlxalq qəzəbin simvolu kimi dəyərləndiriblər. Həmin səhnəyə aid görüntülər qısa zamanda sosial mediada geniş yayılıb və çoxsaylı reaksiyalar doğurub.

İştirakçılar yerə uzanaraq Qəzzədə minlərlə mülki şəxsin həyatını itirməsini simvolik şəkildə canlandırıblar.

Aksiyada iştirak edən fəallardan biri deyib: “Biz bu hərəkətlə göstərmək istəyirik ki, dünya insanları hələ də vicdan sahibidir; Fələstinlilərin əzabına susmaq, zorakılığa şərik olmaq deməkdir.”

Etiraz aksiyası polis müdaxiləsi olmadan, sakit şəraitdə başa çatıb. Bir çox iştirakçı şam yandıraraq “Free Palestine” şüarları ilə tədbiri yekunlaşdırıb.

Bu hadisə son günlərdə Asiya və Avropanın müxtəlif şəhərlərində keçirilən oxşar aksiyalar fonunda baş tutub və Fələstinlə həmrəylik dalğasının qlobal miqyasda gücləndiyini göstərir.