SAHAR

İraqın müdafiə nazirliyi bildirib ki, Əlbəğdadi ilə bağlı bir nişanənin tapılması üçün İraqın təhlükəsizlik zindanlarında on yeddi ölkədən olan 87 İŞİD-çi terrorçu istintaq olunur.

Mehr xəbər agentliyinin məlumatına görə, iraqlı rəsmilərin sözlərinə görə, bu şəxslər İraqda mühakimə edilərək, cəzalandırılacaq və vətəndaşları olduqları ölkələrə təhvil verilməyəcəklər.

İŞİD-dən olan 14 qadın və 30 uşaq da İraqın təhlükəsizlik qüvvələrinin ixtiyarındadır. 10 yaşından aşağı yaşa malik bütün otuz uşaq İraqın sosial məsələlər nazirliyinə təhvil verilib.

Belə bir halda, “Əl-Quds Əl-Ərəbi” qəzeti İŞİD başçısı Əbubəkr Əlbəğdadinin Suriyanın Diyrəzzur məntəqəsində olmasından xəbər verib. Bundan öncə bir çox informasiya mənbəyi Əlbəğdadinin öldürülməsindən xəbər vermişdi.