Ceninin qərbində bir fələstinli gənc şəhid edilib
Yerli mənbələr Ceninin qərbində qəsbkar hərbçilərin atəşləri ilə bir fələstinli gəncin şəhid edildiyini bildiriblər.
Bu mənbələrin sözlərinə görə, Abdullah İmad Əbu-Həsən qəsbkar sionist hərbçilərin Ceninin qərbində yerləşən Kəfərdan qəsəbəsinə basqını zamanı şəhid edilib.
Qərb sahilində fələstinlilərlə işğalçı qüvvələr arasındakı gərginliklər ən yüksək səviyyədə davam etməkdədir və bundan bir saat öncə də elan edilmişdi ki, sionist rejim ordusunun hərbçiləri Nablus şəhərinə basqın ediblər. Sionistlər bu şəhərdə bir fələstinli döyüşçünün evini mühasirəyə alıblar.
Əlcəzirə telekanalı da bununla bağlı xəbər veribdir ki, işğalçı qüvvələrlə Fələstin müqavimət döyüşçüləri arasında gedən silahlı toqquşma, onların Rafiziyyə məhəlləsində mühasirə etdikləri evin ətrafında davam edir və Nablus döyüşlərində indiyədək bir neçə fələstinli yaralanıbdır.
Fələstinli mənbələr də bildiriblər ki, sionist hərbçilər mühasirə edilmiş mənzilə tərəf dörd ədəd «Matador» raketi atıblar.
Bu mənbələr qərb sahilində fələstinli gənclər tərəfindən sionist hərbçilərin avtomobilinin hədəfə alınmasından xəbər veriblər.
Sionist hərbçilərin avtomobili Nablusda yandırıcı bomba ilə hədəfə alınıb və yandırılıbdır.
Bu hadisədən az öncə ibri mənbələr də bildirmişdilər ki, sionist hərbçilər işğal olunmuş Qüdsdəki «fransız təpə» bölgəsində bir fələstinli gəncə tərəf atəş açıblar.
Həmin mənbələr əlavə ediblər ki, bu gənc soyuq silahla sionist hərbçilərə hücum edib və sionist təhlükəsizlik qüvvələrindən birini yaralayıbdır.. Sözügedən fələstinli gəncin vəziyyəti hələlik məlum deyil.
Eyni zamanda xəbər verilibdir ki, sionist rejim ordusunun hərbçiləri və fələstinli gənclər Əlxəlilin şimalında yerləşən «Beyt Əmr» qəsəbəsinin girəcəyində toqquşublar.
Yerli mənbələr bu toqquşma ilə bağlı bildiriblər ki, qəsbkar hərbçilərdən biri həmin toqquşmada yaralanıbdır.
Digər tərəfdən, sionist rejim ordusunun hərbçiləri və fələstinli gənclər işğal olunmuş Qüdsün şimalında yerləşən Əl-Ram qəsəbəsində toqquşublar.
