Paşinyan Tavuşdakı görüşlərdən sonra açıqlama verdi
“Heç bir sual cavabsız qalmamalıdır”
Ermənistanın Tavuş vilayətində keçirilən görüşlərdən sonra baş nazir Nikol Paşinyan müzakirələrin bəzi detallarını açıqlayıb.
Görüşlə bağlı suala cavab olaraq Paşinyan bildirib ki, görüşlər tamamilə videoçəkiliş edilib, video yayımlanacaq, lakin gizli elementləri ehtiva edən hissələr açıqlanmayacaq.
Baş nazir qeyd edib ki, ən önəmlisi martın 12-də mətbuat konfransı zamanı dedikləridir.
“Orada göstərdiyim Ermənistanın konturunu mən burada da göstərdim”, - deyə Paşinyan vurğulayıb.
Paşinyan həmçinin xatırladıb ki, Tavuş rayonunun sərhəd kəndlərinin sakinləri anklavların Azərbaycana təhvil veriləcəyi təqdirdə blokadaya düşmək ehtimalından narahatdırlar.
Paşinyan deyib: “Onlar bizə öz narahatlıqlarını bildirdilər və biz də suallarını cavablandırdıq. Bizim yanaşmamız ondan ibarətdir ki, insanların qaldırdığı suallar cavabsız qalmasın. Bəzi suallarla bağlı sakinlərə dedim ki, mən təkcə sualları cavablandırmaq üçün deyil, həm də o sualları toplayıb hökumətin gündəliyinə çıxarmaq, onların cavablarına baxıb cavab vermək üçün gəlmişəm”.
Onun sözlərinə görə, ən əsası odur ki, insanların narahatlığı və təhlükəsizliyi faktiki olaraq sübuta yetirilməli və struktur normativ sənədlərlə əsaslandırılmalıdır.
Paşinyan qeyd edib ki, görüşlər zamanı insanlar arasında ümidsizlik hiss etməyib.
Ermənistanın baş naziri sonra deyib: “Biz görürük ki, Bağanisdən Bibişə qədər bu hissədə Ermənistanla Azərbaycan arasında dövlət sərhədinin delimitasiyası və demarkasiyası prosesinə başlamaq üçün real imkan var.
“Azərbaycan dörd qeyri-anklav kəndi ilə bağlı məsələ qaldırır, biz isə 31 kənddən danışırıq. Bizim siyasətimiz ondan ibarətdir ki, biz müharibəyə imkan verməməliyik. Ona görə də biz qərara gəldik ki, bu ərazidə Ermənistan sərhədini tənzimləməliyik. Biz bunu təkcə Ermənistan naminə deyil, həm də konkret olaraq Əskipara və Kirants kəndləri üçün, bu kəndlərin təhlükəsizliyini təmin etmək üçün edirik”, - deyə Paşinyan sözlərinə əlavə edib.
