Rəsmi Tbilsi yolunu Qərbdən ayırır
Gürcüstan nümayəndə heyəti AŞPA-dakı fəaliyyətini dayandırdı
“Gürcü Arzusu” Avropa Şurası Parlament Assambleyasında (AŞPA) fəaliyyətini dayandırıb.
Gürcüstan nümayəndə heyətinin rəhbəri Tea Tsulukiani bu barədə deyib ki, AŞPA-da Gürcüstanla bağlı qəbul edilmiş qətnamədəki şərtlər və qeydlər qəbuledilməz, ədalətsiz və əsassızdır.
Onun sözlərinə görə, AŞPA-nın yeni seçkilər keçirmək tələbi Gürcüstanın suverenliyini pozur, gürcü xalqının iradəsinə məhəl qoymur. Ona görə də Gürcüstan parlamenti nümayəndə heyətinin üzvləri bu gündən etibarən AŞPA-dakı fəaliyyətini dayandırır.
AŞPA-nın qəbul etdiyi qətnamədə iddia olunub ki, 26 oktyabr 2024-cü il parlament seçkilərindən sonra baş verən hadisələr, o cümlədən sərbəst toplaşmaq və ifadə azadlığının məhdudlaşdırılması, müxalifətin və vətəndaş cəmiyyəti nümayəndələrinin sıxışdırılması Gürcüstanın Avropa Şurasına üzvlük öhdəliklərinə ziddir.
