İraq təhlükəsizlik qüvvələri Fəllucənin şimalında 400 cəsədi olan kütləvi məzarlıq aşkarlayıb.

Süməriyyə telekanalının məlumatına görə, İraq təhlükəsizlik və könüllü xalq qüvvələri bazar günü Fəllucənin şimalında yerləşən Həyyüş-Şühəda bölgəsində bir kütləvi məzarlıqda İraq ordusunun 400 hərbçisinin cəsədini aşkarlayıb.

İraq xəbər dairələri həmçinin bir çox mənzildə də kütləvi məzarlığın olduğunu bildiriblər: Bəzi cəsədlərdə güllələr müşahidə olunub və bəziləri isə bomba qoyulmuş avtomobillər vasitəsi ilə öldürülüblər.

Qeyd edək ki, İraq baş naziri Heydər əl-İbadinin Fəllucənin azad olunması üçün göstərişi ardınca, bu ölkə ordusu könüllü xalq qüvvələrinin dəstəyi ilə Fəllucənin azadlığı üzrə xüsusi əməliyyata başlayıb.

Bu arada İraqın müdafiə naziri Xalid əl-Übeydi şənbə günü Səqlaviyyə bölgəsinin azad olunduğunu və İŞİD terror qruplaşmasına ağır zərbənin endirildiyini bildirib.