SAHAR

İraqın təhlükəsizlik dairələri bazar günü ifşa ediblər ki, İŞİD terror qruplaşması daxili boşluqla üzləşib və bu terror qruplaşmasının bir qrup ünsürü öz başçılarının göstərişlərindən boyun qaçırır.

İraqın əl-Fərat Nyuz xəbər agentliyinin məlumatına görə, Mosulda İŞİD terror qruplaşmasının başçılarından biri Əbu Abdulla Əş-Şami İŞİD başçısı Əbubək əl-Bağdadiyə biətini ləğv və elan edib: Qüdrəti və hakimiyyətini itirən şəxsə biət batildir.

Bu arada əl-Həşdüş-Şəəbi qüvvələrinin komandanlarından Əbu Zeynəb əl-Xəzəli bildirib: Bu qüvvələr İŞİD ünsürlərinin Mosulun bəzi bölgələrində quraşdırdıqları lazer bombaları zərərsizləşdiriblər.

İraqın şimalında Neynəva vilayətinin mərkəzi olan Mosulun İŞİD terror qruplaşmasından azad edilməsi əməliyyatı 2016-cı il 17 oktyabrda İraq baş naziri Heydər əl-İbadinin göstərişi ilə başlanıb. İraqın ikinci böyük şəhəri Mosul İŞİD terror qruplaşmasının sonuncu gizləndiyi məkandır. Bu terror qruplaşması 2014-cü ildən Mosula nəzarəti ələ keçirib.