SAHAR

Bəhreyn vətəndaşları nüfuzlu ruhani Şeyx İsa Qasimin mənzilinin mühasirəsinin pislənilməsi istiqamətində ölkənin müxtəlif bölgələrində Ali-Xəlifə rejimi əleyhinə aksiyalar təşkil ediblər.

İRNA-nın bəhreynli fəallara istinadla verdiyi məlumata görə, Bəhreyn vətəndaşları ötən gün günortadan sonra müxtəlif bölgələrdə, o cümlədən paytaxt Manama şəhərində Şeyx İsa Qasimə dəstək aksiyası keçiriblər.

Bəhreynli aksiyaçılar Şeyx İsa Qasimin mənzilinin mühasirəsinə son qoyulmasını vurğulayıblar.

Bu arada Ali-Xəlifə rejimi hərbçiləri 80-ci həftə ardıcıl olaraq Bəhreyn şiələrinin nüfuzlu ruhani Şeyx İsa Qasimin yaşadığı məkan Əd-Duraz məhəlləsində cümə namazı qılmasına mane olublar.

Ali-Xəlifə rejiminin bu hərəkəti ardınca, Əd-Durazda rejim əleyhinə irimiqyaslı aksiya keçirilib.

Ali-Xəlifə rejimi 2016-cı ildə Şeyx İsa Qasimin vətəndaşlığını ləğv etməklə onun yaşadığı məkanı mühasirəyə alıb.

Həmin zamandan Bəhreyn gəncləri alimlərin rəhbərliyi ilə Əd-Duraz məhəlləsində Şeyx İsa Qasimin mənzili ətrafında onu müdafiə məqsədilə aksiya keçiriblər.

Bəhreyn 14 fevral 2011-ci ildən Ali-Xəlifə rejimi əleyhinə xalq inqilabının şahididir. Bəhreyn vətəndaşları azadlıq, ədalətin bərpa olunması, ayrı-seçkiliyin aradan qaldırılması və seçilmiş hökumətin yaranmasını istəyirlər.