İran İslam Şurası Məclisinin üzvləri bir bəyanat qəbul edərək, Yeni Zelandiyada onlarla nəfərin ölməsi və yaralanmasına səbəb olan son terror aktını qınayıblar.

İRİB-nin bildirdiyinə görə, İran İslam Şurası Məclisinin üzvlərinin bəyanatında deyilir: Yeni Zelandiyada həyata keçirilən terror hücumu bir daha sübut etdi ki, dünyanın zalım qüdrətləri üçün insan haqları və yaşamaq haqqı öz anti-humanist planlarını həyata keçirmək üçün vasitədən başqa bir şey deyil.

İran parlamentinin üzvləri həmçinin, İslam və müsəlmanların adından istənilən növ sui-istifadəyə qarşı mübarizənin aparılmasını istəyərək, terrorçularla bağlı ikili standartlara son qoyulmasını  bir zərurət adlandırıblar.