İranın xarici işlər naziri Tehran və İslamabad arasında terrorla mübarizə sahəsində əməkdaşlığın genişləndirilməsinə dair razılığın əldə olunduğunu açıqlayıb.

İranın xarici işlər naziri bazar ertəsi axşam İslamabaddan Tehrana yola düşməzdən əvvəl jurnalistlərə verdiyi açıqlamada deyib: "Bu səfər zamanı Pakistanın yüksək səviyyəli rəsmiləri ilə çox mühüm və konstruktiv görüşlər keçirildi və iqtisadi, ticarət, turizm, enerji və digər sahələrdə əməkdaşlığın daha da sürətlə davam etdirilməsi barədə razılığa gəlindi".

Əmir Abdullahian əlavə edib: "İran və Pakistan hökumətləri razılaşıblar ki, müəyyən bir zaman cədvəlinə əsasən, iki qonşu ölkə arasında mövcud olan sərhəd keçid məntəqələrinə beş yeni sərhəd keçidi əlavə olunsun.

O, vurğulayıb ki, iki ölkənin təhlükəsiz sərhədləri ticarət, iqtisadi və turizm sərhədlərinə çevrilməlidir, çünki hər iki ölkə bu sərhədlərdə terrorçuluq və terror aktları üçün yer olmadığına inanır. 

Qeyd edək ki, İranın xarici işlər naziri Hüseyn Əmir Abdullahian bazar ertəsi Pakistana bir günlük səfəri çərçivəsində bu ölkənin xarici işlər naziri, ordu komandanı və baş naziri ilə görüşdü.