Xərrazi erməni rəsmiyə:
ABŞ şirkətinin Azərbaycan-Ermənistan rabitə marşrutunda iştirakının təfərrüatlarına aydınlıq gətirilməlidir
İranın Xarici Əlaqələr üzrə Strateji Şurasının sədri Ermənistan Təhlükəsizlik Şurasının katibi ilə görüşdə deyib: ABŞ şirkətinin Azərbaycan-Ermənistan rabitə marşrutunda iştirakının təfərrüatları dəqiqləşdirilməlidir.
Ermənistan Təhlükəsizlik Şurasının katibi Armen Qriqoryan şənbə günü İran Xarici Əlaqələr üzrə Strateji Şuranın sədri Kamal Xərrazi ilə görüşüb və ikitərəfli, regional və beynəlxalq əlaqələri müzakirə edib.
Xərrazi bu görüşdə Qafqaz regionunu son dərəcə mühüm və onun məsələlərinin mürəkkəb olduğunu qeyd edərək, deyib: “Biz müstəqil ölkələri dəstəkləyirik və Ermənistana istənilən yardımı göstərməyə hazırıq. Necə ki, bu günə qədər Ermənistanın müstəqilliyini və suverenliyini dəstəkləmişik".
İran Xarici Əlaqələr üzrə Strateji Şuranın rəhbəri əlavə edib: "Biz sizin Azərbaycan Respublikası ilə razılaşmanızdan məmnunuq, bu sazişdə İranın müsbət fikirlərinin nəzərə alınmasından da məmnunuq. Bununla belə, Amerika şirkətinin Azərbaycan Respublikası ilə Ermənistan arasında kommunikasiya xəttində iştirakı ilə bağlı sözügedən müqaviləsinin təfərrüatlarına aydınlıq gətirilməlidir ki, bu marşruta hansı qaydaların hakim olacağı dəqiq müəyyən edilsin. Əlbəttə, nəzərə almaq lazımdır ki, Tramp heç bir qaydaya, hətta öz imzasına belə sadiq deyil".
Armen Qriqoryan isə öz növbəsində İrana səfərindən məmnunluğunu bildirib və Azərbaycan Respublikası ilə Ermənistan arasında paraflanmış sülh sazişi ilə bağlı bildirib: “Bu müqavilədə ölkələrin ərazi bütövlüyü, milli suverenliyi, yurisdiksiyası, sərhədlərin toxunulmazlığı və qarşılıqlı addım prinsipinə hörmətin zəruriliyi vurğulanıb".
O, əlavə edib: "Erməni qüvvələri sərhədə nəzarət edəcək və bu yolun təhlükəsizliyini təmin edəcək və bütün infrastruktur Ermənistan hökumətinin nəzarəti altında olacaq”.
Ermənistan Milli Təhlükəsizlik Şurasının katibi ölkəsinin İranın qırmızı xətlərinə həssas yanaşdığını vurğulayıb.
