Almaniyada ABŞ-ın addımlarını axmaqlıq adlandırıblar
Bundestaqın deputatı: Avropanın Rusiya ilə əməkdaşlığına ABŞ həsəd aparırdı
Alman bundestaqının sol partiyadan olan deputatı Sara Vaqenknext özünün YouTube kanalında bildirib ki, Vaşinqton ABŞ-ı yeganə dünya gücünə çevirmək məqsədini davam etdirir.
SəhərAzəri-nin məlumatına əsasən, deputat deyib: “Amerika rəhbərliyinin axmaqlığı ondan ibarətdir ki, o, Rusiya və ya Çin ilə tərəfdaşlıqda deyil, onları sərt şəkildə ələ keçirməkdə maraqlıdır. Qərb "parçala və hökmranlıq et" siyasətindən uzaqlaşmalıdır”.
Anti-Rusiya sanksiyalarını tənqid edən deputat bunların yalnız Vaşinqtona sərfəli olduğunu deyir.
“Sanksiyalar Avropada enerjini çox bahalaşdırıb. Buna Putin deyil, Qərb qərar verib. İqtisadi məhdudiyyətlər eyni dərəcədə Avropaya yönəlib. Həqiqət budur ki, Avropa-Rusiya enerji əməkdaşlığı 1970-ci illərdən bəri Amerika rəhbərliyinin gözünə sanki bir tikan kimi batıb”, - deyə Vaqenknext yekunlaşdırıb.
Daha əvvəl xəbər verİldiyi kimi, Rusiya Prezidenti Vladimir Putin Qərb ölkələrinin enerji siyasətini “iqtisadi intihar” adlandırıb.
