Alen Simonyan:
“Bizim üçün ermənilərin hüquqlarının müdafiəsi ən vacib məsələdir”
Ermənistan parlamentinin sədri Alen Simonyan Qarabağdakı ermənilərin hüquqları mövzusunun Ermənistan ilə Azərbaycan müzakirələrinə daxil edilməyəcəyi təqdirdə bu müzakirələrin mənasız olduğunu deyib.
Ermənistan parlamentinin sədri Alen Simonyan Azərbaycan XİN rəhbəri Ceyhun Bayramovun Qarabağ ermənilərinə əlavə heç bir təhlükəsizlik təminatı verilməyəcəyi, yalnız öz dillərində danışa biləcəkləri haqda açıqlamasını şərh edərkən deyib: “Bu bəyanat məhz Azərbaycana ziyan vurur, çünki mövcud reallıqları nəzərə alaraq onilliklər ərzində münaqişəyə səbəb olan məsələni həll etməyiblər.”
Simonyana görə “Bu, reallıqdan qaçmaqdır, bu, məsələnin həlli olmayacaq və bu məsələlərin müzakirə olunmaması Azərbaycan üçün sərfəli deyil: “ Əminəm ki, onlar nə vaxtsa buna da gələcəklər. İndi də hesab edirəm ki, bu, danışıqlardan əvvəl və danışıqların ilkin mərhələsi kimi “yüksək standart”ın müəyyən edilməsi üçün edilir”, - o bildirib.
Alen Simonyan deyib ki, bizim üçün ermənilərin hüquqlarının müdafiəsi ən vacib məsələdir:
“Bu məsələni sadəcə unutmaq olmaz, bu, özünü aldatmaqdır. Əgər Azərbaycan özünü aldatmağa hazırdırsa, Ermənistan buna hazır deyil, biz bəyanatlarımızda ardıcıl olacağıq.
“Bu hissənin sülh müqaviləsinə daxil edilib-edilməyəcəyini və ya ayrıca sənəd olacağını bilmirəm, çünki konkret təminatlar lazımdır. 9 (10) noyabr bəyanatının şərtlərinə əməl olunmadığı təcrübəsi var. Əgər bu məsələ müzakirə olunmayıbsa, bu məsələnin həlli tapılmasa, deməli, bu danışıqların böyük hissəsi mənasızdır”,- Ermənistan parlamentinin sədri deyib.
