Azərbaycanla Ermənistan arasında anklav torpaqların qaytarılması məsələsi gündəmə gətirilir.

Azərbaycan tərəfinin bildirdiyinə görə, bu ölkənin dörd anklavı - Yuxarı Əskipara, Sofulu, Barxudarlı, bir də Naxçıvan tərəfdə Kərki kəndi hazırda Ermənistanın nəzarətindədir. Azərbaycan isə, İrəvanın iddiasına görə, Ermənistan ərazisinin 200 kvadrat kilometrlik ərazisinə və Gədəbəy Rayonunda yerləşən Artsvaşen qəsəbəsinə nəzarət edir.

Ermənistan baş naziri Nikol Paşinyan avqustun 21-də iki ölkənin bir-birinə ərazi qaytarma mümkünlüyündən danışıb. O, ərazilərin mübadiləsi variantını da istisna etməyib. Azərbaycan rəsmiləri Paşinyanın ərazi mübadiləsi məsələsinə münasibət bildirməyib. Prezident İlham Əliyev ötən ilin yanvarında demişdi ki, anklav kəndlərlə bağlı ayrıca ekspert qrupu yaradılmalıdır, bütün anklavlar qaytarılmalıdır.

Bəzi ekspertlər bu qənaətdədirlər ki, Azərbaycan və ya Ermənistan tərəfindən anklav ərazilərin qaytarılması o qədər də real deyil və ola bilsin ki, torpaq mübadiləsi üsulu masa üzərinə gətiriləcək.