SAHAR

Türkiyədəki yanğınlar faciəsi ilə əlaqədar Ərdoğan səfərbərlik elan etdi. Meşə yanğınları törətməkdə şübhəli bilinən şəxslər saxlanılıb.

SəhərAzəri-nin məlumatına əsasən, Türkiyə hökuməti ölkənin bir sıra bölgələrini əhatə edən meşə yanğınlarının aradan qaldırılması üçün bütün mövcud imkanları səfərbər edib.

Türkiyə Prezidenti Rəcəb Təyyib Ərdoğan bununla əlaqədar təbii fəlakətdən zərər çəkmiş bölgədə olan Kənd təsərrüfatı və meşəçilik naziri Bəkir Pakdemirli, Ətraf mühit və şəhərsalma naziri Murat Kurum və Xarici işlər naziri Mövlud Çavuşoğlu ilə mütəmadi əlaqə saxlayır.

Nazirlik rəhbərləri prezidentə meşə yanğınları zonasındakı vəziyyət barədə məlumat veriblər.

Türkiyə Prezidentinin sözçüsü İbrahim Kalın da meşə yanğınlarını milli fəlakət adlandırıb

İbrahim Kalın “Twitter” hesabında yazıb: “Bütün qurumlarımız əlaqəli şəkildə yanğınla böyük bir mübarizə aparır. Prokurorluq orqanları yanğınların səbəblərini hərtərəfli araşdırır. Çalışmalar fasiləsiz davam etdiriləcək”. 

Qeyd edək ki, hazırda ölkədə 42 yanğın nəzarət altına alınıb, Antalya, Mersin və Adana daxil olmaqla 21 qaynar nöqtədə yanğın davam edir.

Adanada baş verən 20 yanğından 6-sının Antalyada 10 yanğından 4 -nün, Mersində 7 yanğından 4 -nün, Osmaniyədə 4 yanğından 3 -nün, Muğlada 4 yanğından 2-nin,  Kayseri və Manisada isə bir yanğının hələ də söndürülmədiyi qeyd edilir.

Kayseri, Manisa, Kütahya, Balıkesir, Kilis, Kahraman-Maraş, Kocaeli, Kastamonu, Sakarya, İstanbul, Hatay, Bursa, İzmir, Diyarbakır və Karaman vilayətlərində yanğınlar nəzarət altına alınıb.

Bu arada Türkiyədə meşə yanğınları törətməkdə şübhəli bilinən PKK terror təşkilatının üzvləri Manisa vilayətinin Turqutlu bölgəsində yaxalanıb.

Şübhəlilər hüquq -mühafizə orqanları və ölkənin Milli Kəşfiyyat Təşkilatının birgə keçirdiyi əməliyyat zamanı saxlanılıb.

Ən son məlumata əsasən, Türkiyənin Antalya şəhəri və ətraflarında baş verən irimiqyaslı meşə yanğınları nəticəsində 4 nəfər ölüb, 180-dən çox insan yaralanıb.