Türkiyədə 2023-cü il seçkilərinin ikinci turu başlayıb
Bu gün Türkiyədə prezident seçkilərinin ikinci turu keçirilir və hazırkı dövlət başçısı Rəcəb Tayyib Ərdoğan və müxalifət lideri Kamal Kılıçdaroğlu ölkənin ən yüksək postu uğrunda mübarizə aparır.
SəhərAzəri-nin məlumatına görə, bazar günü yerli vaxtla səhər saat 8:00-da türklərin Ərdoğan və ya Kılıçdaroğlunu beş il müddətinə prezident seçəcəyi ikinci tur seçkilərində səsvermə məntəqələri açılıb və səsvermə prosesi saat 17:00-a qədər davam edəcək.
Mayın 14-də keçirilən birinci turda heç bir namizəd 50 faiz səs toplaya bilməyib və seçki ikinci tura keçirilib.
Səsvermənin birinci turunda Rəcəb Tayyib Ərdoğan 49,5 faiz dəstək qazanıb. Müxalifətin əsas rəqibi Kamal Kılıçdaroğlu 44,9 faiz səs toplayıb.
Seçilən prezident Türkiyənin iqtisadiyyatı, təhlükəsizliyi, daxili və beynəlxalq münasibətləri ilə bağlı siyasəti müəyyən edəcək.
Ərdoğan deyib ki, mayın 28-də türk seçiciləri "həyatlarının ən mühüm seçimini, ölkənin və onun uşaqlarının gələcəyi ilə bağlı qərar" verməli olacaqlar.
Kılıçdaroğlu isə öz növbəsində qeyd edib ki, "Türkiyə vətəndaşları ilk dəfə olaraq iki namizəd və iki dünyagörüşü arasında seçim etməli olacaqlar".
Türkiyə prezident seçkilərinin birinci turunda üçüncü yeri tutan Oğan ikinci turda Ərdoğanı dəstəkləyib və tərəfdarlarını hazırkı prezidentə səs verməyə çağırıb.
Nəticənin axşam saatlarında bəlli olacağı gözlənilir.
