İstanbulda rayon bələdiyyə sədri və 47 məmur korrupsiyaya görə saxlanılıb
Türkiyə hakimiyyəti İstanbulun rayonlarından birinin bələdiyyə sədrini və daha 47 məmuru korrupsiya ittihamı ilə həbs edib.
Müşahidəçilər bunu, ölkənin ana müxalifət partiyasına qarşı genişmiqyaslı repressiyaların bir hissəsi kimi qiymətləndirirlər.
Anadolu xəbər agentliyinin məlumatına görə, İstanbul Baş Prokuroluğu Bayrampaşa bələdiyyəsi tərəfindən qəsb, rüşvətxorluq, fırıldaqçılıq və tenderlərdə saxtakarlıq iddiaları ilə bağlı aparılan istintaqla əlaqədar həbslər barədə göstəriş verib.
Bayrampaşa bələdiyyə başçısı Həsən Mutlu deyib: "Baş verənlər siyasi əməliyyatlardan və əsassız böhtandan ibarətdir. Əmin olun ki, siz dəyərli Bayrampaşa sakinləri ilə birlikdə bu böhtanların, bu vicdansızlıqların öhdəsindən gələcəyik".
Son aylarda, ana müxalifətdəki Cümhuriyyət Xalq Partiyası və ya CHP-dən olan ondan çox bələdiyyə sədri və yüzlərlə bələdiyyə məmuru, korrupsiya ittihamı ilə həbs edilib. O cümlədən İstanbul Bələdiyyə Başçısı Əkrəm İmamoğlu.
Prezident Rəcəb Tayyib Ərdoğanın növbəti prezident seçkilərində əsas rəqibi kimi tanınan İmamoğlunun həbsi geniş etirazlara səbəb olub.
CHP deyir ki, bu həbslər və iddialar hökumətin müxalifəti zəiflətmək və Ərdoğanın daha 5 il hakimiyyətə qalması üçün yolu hamarlamaq cəhdlərinin bir hissəsidir. Hökumət isə bu iddiaları rədd edir və Türkiyə məhkəmələrinin müstəqil olduğunu deyir.
