İran və Azərbaycan arasında energetika sahəsində əməkdaşlıq müzakirə edilib
İran İslam Respublikası və Azərbaycan Respublikası arasında energetikanın müxtəlif sahələri üzrə əməkdaşlıqlar araşdırılıb və müzakirə edilib
SəhərAzəri İRİB-in Bakı bürosunun məlumatına istinadən xəbər verir, İran İslam Respublikasının Azərbaycandakı səfiri Seyid Abbas Musəvi və Azərbaycan Respublikasının energetika naziri Pərviz Şahbazov arasında videokonfrans formatında görüş keçirilib. Bu görüşdə tərəflər energetikanın müxtəlif sahələri üzrə əməkdaşlığın inkişaf etdirilməsi yolları barədə fikir mübadiləsi aparıblar.
Azərbaycanın energetika nazir Ermənistan ilə Azərbaycan Respublikası arasındakı son münaqişələr barədə İran səfirini məlumatlandırıb və İranla Azərbaycan arasında enerji sektorunda birgə həyata keçirilən layihələr və onların icra vəziyyəti və görülən işlər barədə fikirlərini bildirib, habelə İran İslam Respublikasının yeni səfirinin Bakıda olmasının da iki ölkə arasında illərdir davam edən uğurlu əməkdaşlığa töhfə verəcəyinə ümidvarlıq ifadə edib.
Bu virtual görüşdə İranla neft-qaz, elektroenergetika sahələrində əməkdaşlığın mövcud vəziyyəti, birgə layihələrin icrası və digər məsələlər müzakirə olunub.
İran İslam Respublikasının Azərbaycan Respublikasındakı səfiri Seyid Abbas Musəvi də enerji sahəsində ikitərəfli əməkdaşlığın inkişaf etdirilməsi və birgə layihələrin icrasının sürətləndirilməsinin vacibliyini vurğulayıb.
Bu iclasda, həmçinin iki ölkənin birgə texniki komitəsinin iclasının ən tez bir zamanda keçirilməsi qərara alınıb.
