Türkmənistan-Azərbaycan-İran əməkdaşlığı reallaşır
Üçtərəfli qaz sazişi üzrə komissiya yaradılır
Türkmənistan-Azərbaycan-İran arasında qaz sazişi üzrə komissiyanın yaradılması təklif olunur.
SəhərAzəri-nin məlumatına əsasən, Türkmənistan, Azərbaycan və İran arasında imzalanmış suap qaz tədarükü haqqında saziş çox əhəmiyyətli hadisədir. Təbii qaz mübadiləsi sahəsində, 3 ölkə arasında birgə əməkdaşlıq komissiyası yaradılmalıdır.
Bunu İran Prezidenti Seyid İbrahim Rəisi ilə telefon danışığında Türkmənistan Prezidenti Qurbanqulu Berdiməhəmmədov deyib.
İran prezidenti isə deyib ki, üç ölkə arasında qaz sahəsində yaxşı əməkdaşlıq qurulub və Türkmənistanla Azərbaycanın İran vasitəsi ilə bu sahədə iştirakını artırılması nəzərdə tutulub.
Xatırladaq ki, bu ilin noyabrın 28-də Aşqabadda İran İslam Respublikası, Azərbaycan və Türkmənistan arasında qaz mübadiləsinə dair üçtərəfli saziş imzalanıb. İmzalanma mərasimində Azərbaycan Respublikasının prezidenti İlham Əliyev və İran İslam Respublikasının Prezidenti Seyid İbrahim Rəisi iştirak edib.
Müqaviləyə əsasən, Türkmənistandan İran vasitəsilə Azərbaycana ildə 1,5-2 milyard kubmetrədək qaz göndəriləcək. Müddətsiz müqavilənin icrasına bu il dekabrın 22-də başlanılacaqdır.
