İran Quterreşin Qəzzəyə təcavüzü dayandırmaq üçün addımını alqışlayır
İran Xarici İşlər Nazirliyinin sözçüsü Nasir Kənani BMT baş katibi Antonio Quterreşin sionist rejimin Qəzzəyə qarşı başlatdığı təcavüzün dayandırılması üçün Təhlükəsizlik Şurasına müraciətini müsbət qarşılayıb.
BMT-nin baş katibi Antonio Quterreş çərşənbə günü BMT Nizamnaməsinin nadir hallarda istifadə olunan 99-cu maddəsinə istinad edərək, BMT Təhlükəsizlik Şurasını Qəzzədə humanitar fəlakətin qarşısını almağa çağırıb.
Quterreş məktubunda yazır: "Qəzzədə vəziyyət sürətlə fəlakətə doğru irəliləyir və beynəlxalq ictimaiyyət Qəzzə böhranına son qoymaq üçün öz təsirindən istifadə etməlidir.
Qəzzədə atəşkəsin vacibliyini vurğulayan Antonio Quterreş BMT Təhlükəsizlik Şurasının üzvlərini təzyiq göstərərək, bölgədə humanitar böhranın qarşısını almağa çağırıb.
İran Xarici İşlər Nazirliyinin sözçüsü Nasir Kənani verdiyi açıqlamada Antonio Quterreşin bu hərəkətini müsbət qarşılayıb və deyib: "Qəzzə zolağına qarşı təcavüzün miqyası, mülki əhalinin, xüsusən də uşaq və qadınların öldürülməsi, xəstəxanalar da daxil olmaqla mülki yerlərin dağıdılması və əhalinin böyük əksəriyyətinin bu zolağın digər bölgələrinə məcburi köçürülməsi regional sülh və təhlükəsizliyə təhdiddir".
O, əlavə edib ki, BMT-nin baş katibinin Qəzzə zolağında vəziyyətin çox əhəmiyyətli dərəcədə pisləşməsi ilə bağlı Təhlükəsizlik Şurasının sədrinə ünvanladığı məktubda yer alan məlumatlar bütün aidiyyəti hökumətlərin və beynəlxalq təşkilatların işğalçı rejimin fələstinlilərə qarşı törətdiyi hücum və cinayətləri dayandırmaq və Qəzzə zolağının məzlum sakinlərinə dəstək olmaq üçün təcili və ciddi addımlar atmasının zəruriliyini təsdiqləyir.
Kənani qeyd edib ki, əsas məsuliyyət beynəlxalq sülh və təhlükəsizliyə qarşı təcavüz və təhdidlərin dərhal qarşısını almaq üçün hüquqi cəhətdən aydın və konkret vəzifələri olan BMT Təhlükəsizlik Şurasının üzərinə düşür və bu Şura heç bir bəhanə ilə öz öhdəliklərini təxirə sala və onları yerinə yetirməkdən boyun qaçıra bilməz.
İran Xarici İşlər Nazirliyinin sözçüsü vurğulayıb ki, Təhlükəsizlik Şurasından gözlənilən yeganə təsirli addım işğalçı İsrail rejimini bütün hücumlarını və hərbi hərəkətlərini dərhal, tamamilə və davamlı olaraq, dayandırmağa məcbur etmək üçün aydın və qəti şəkildə dərhal qərar qəbul etməkdir.
Qeyd edək ki, ən son məlumatlara əsasən, indiyədək 17 mindən çox fələstinli şəhid olub, 46 mindən çox fələstinli isə yaralanıb.
