SAHAR

Bu gün, 1436-cı h.q. ili şəbanın 15-i və 2015-ci milad ili iyunun üçü, dünya şiələrinin 12-ci imamı Həzrət İmam Mehdi(əc) mövludunun ildönümü gününə təsadüf edir.

Həzrət İmam Mehdi(əc) 255-ci h.q. ilinin şəban ayının 15-i səhər tezdən İraqın Samirra şəhərində dünyaya göz açdı. O həzrətin ləqəblərindən höccət, qaim, xələfi-salih, sahibəzzəman, bəqiyətəllah və ən məşhur ləqəbi Mehdidir. Atası, on birinci imam Həzrət İmam Həsən Əsgəri(ə) və anası möhtərəm xanım- Nərcisdir. Bu möhtərəm xanım Reyhanə, Susən və Səqil adları ilə də xatırlanıbdır.
Həzrət Mehdi iki dövr qeybolmaya malik olub. Birisi, qısa müddətli "qeybəti suğra", digəri isə uzunmüddətli "qeybəti kubra"dır. Birinci qeybolma təvəllüd günündən xas naiblik dövrünədək davam edib. İkincisi isə ilk dövrün bitməsi ilə başlanıb və o həzrətin zühuru və qiyamınadək davam edəcək.
Bütün İran xalqı bu münasibətlə dünən gecə və bu gün küçələri bəzəyib, çıraqban etmək və şirniyyat və şərbət paylamaqla Həzrət İmam Mehdi(əc) mövludunun ildönümü gününü bayram edir.
İranın Teleradio Təşkilatı bəşəriyyət aləminin yeganə xilaskarının mövludunun ildönümü günü münasibətilə bütün dünya müsəlmanları və Əhli-Beyt(ə)-ı təbrik edir.